МАРКА 13 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ І, калі Ён выходзіў са святыні, гаворыць Яму адзін з вучняў Яго: «Настаўнік, глянь, што за камяні ды якія пабудовы!»

² А Ісус гаворыць яму: «Бачыш усе гэтыя велізарныя будоўлі? Не застанецца з іх каменя на камені, які б не быў развалены».

³ І, калі Ён сядзеў на гары Аліўнай насупраць святыні, пыталіся Яго асобна Пётра, і Якуб, і Ян, і Андрэй:

⁴ «Скажы нам, калі гэта станецца, і што за знак будзе, калі ўсё гэта пачне збывацца?»

⁵ І Ісус пачаў ім казаць: «Глядзіце, каб вас хто не звёў.

⁶ Бо многія прыйдуць у імя Маё, кажучы: “Гэта Я”, і яны многіх звядуць.

⁷ А калі пачуеце вы пра войны і чуткі пра войны, не трывожцеся, бо так павінна быць, але гэта яшчэ не канец.

⁸ Бо падымецца народ на народ ды царства на царства, ды будуць месцамі землятрусы і голад, і смуты. Гэта пачатак пакут.

⁹ Глядзіце самі сябе. Будуць вас аддаваць у суды і біць у сінагогах, і будзеце стаяць перад намеснікамі і царамі на сведчанне ім дзеля Мяне.

¹⁰ І трэба, каб перш было абвешчана Евангелле ўсім народам.

¹¹ І, калі павядуць вас выдаваць, не турбуйцеся загадзя, што вам казаць, але што дадзена вам будзе ў гэты час, тое скажаце, бо не вы будзеце гаварыць, але Дух Святы.

¹² І будзе выдаваць на смерць брат брата і бацька дзіця; і паўстануць дзеці супраць бацькоў ды будуць забіваць іх.

¹³ І будзеце вы ў нянавісці ад усіх за імя Маё; але хто вытрывае да канца, будзе збаўлены.

¹⁴ Дык калі ўбачыце агіду спусташэння, пра што казаў прарок Даніэль, якая паўстала там, дзе не мела быць, – хто чытае, хай разумее, – тады тыя, якія ў Юдэі, хай уцякаюць у горы,

¹⁵ а хто на даху, хай не сыходзіць у дом ды хай не ідзе, каб што ўзяць з дома свайго,

¹⁶ і хто на полі, хай не вяртаецца назад, каб узяць вопратку сваю.

¹⁷ Гора будзе цяжарным ды тым, што кормяць грудзьмі ў тыя дні.

¹⁸ Дзеля таго маліцеся, каб не сталіся ваші ўцёкі зімою.

¹⁹ Бо ў тыя дні будзе такі прыгнёт, якога не было ад заснавання свету, які Бог стварыў, аж дасюль, і не будзе.

²⁰ І, калі б Госпад не скараціў тых дзён, не ўратавалася б аніякае цела; але скараціў гэтыя дні дзеля абраных, якіх Ён абраў.

²¹ І, калі б хто вам тады сказаў: “Вось, тут Хрыстос або, вось, там”, – не верце.

²² Бо з’явяцца фальшывыя хрысты і фальшывыя прарокі і будуць даваць знакі ды цуды, каб звесці, калі гэта магчыма, нават абраных.

²³ Дык вы сцеражыцеся: на тое Я вам усё прадказаў.

²⁴ А ў тыя дні, па тузе той зацемрыцца сонца, ды месяц не дасць святла свайго,

²⁵ і зоркі нябесныя падаць будуць, ды сілы, што на небе, пахіснуцца.

²⁶ І тады ўбачаць Сына Чалавечага, што прыходзіць на аблоках з вялікай магутнасцю і славаю.

²⁷ І тады пашле анёлаў Сваіх, і збярэ з чатырох вятроў; ад краю зямлі да краю неба абраных Сваіх.

²⁸ З фігавага дрэва бярыце прыклад. Калі яго галінка лагаднее і пускае лісты, вы ведаеце, што ўжо блізка лета.

²⁹ Так і вы, калі ўбачыце, што гэта збываецца, ведайце, што і гэта блізка, пры дзвярах.

³⁰ Сапраўды кажу вам: не праміне пакаленне гэтае, аж гэта ўсё станецца.

³¹ Неба і зямля прамінуць, але словы Мае не прамінуць.

³² А дня таго і хвіліны ніхто не ведае; ані анёлы ў небе, ані Сын, толькі Айцец.

³³ Глядзіце, чувайце і маліцеся, бо не ведаеце, калі гэты час надыдзе.

³⁴ Будзе, як з чалавекам, які выехаў у дарогу і пакінуў свой дом, і даў уладу сваім паслугачам, кожнаму свой абавязак, а прыдзвернаму, каб той чуваў.

³⁵ Дык чувайце, бо не ведаеце, калі гаспадар дома вернецца: вечарам, ці апоўначы, ці калі певень запяе, ці раніцай,

³⁶ каб, калі вернецца неспадзявана, не застаў вас спячымі.

³⁷ А што вам кажу, усім кажу: чувайце!»