МАРКА 1 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Пачатак Евангелля Ісуса Хрыста, Сына Божага.

² Як напісана ў Ісаі прарока: «Вось жа, Я пасылаю Анёла Майго перад абліччам Тваім, які прыгатуе дарогу Тваю перад Табой.

³ Голас таго, хто кліча ў пустыні: “Прыгатуйце дарогу Госпаду, прастуйце сцежкі Яму”».

⁴ З’явіўся Ян у пустыні, хрысцячы і абвяшчаючы хрост навяртання дзеля адпушчэння грахоў.

⁵ І прыходзіла да яго ўся краіна Юдэйская і ўсе ерузалімцы, і, вызнаючы грахі свае, былі ім хрышчаны ў рацэ Ярдан.

⁶ Ян жа быў апрануты ў вярблюджы волас ды падпяразаны скураной дзяжкай па сваіх сцёгнах і еў саранчу і дзікі мёд.

⁷ І навучаў ён, кажучы: «Ідзе за мной дужэйшы за мяне, Якому я не варты, пакланіўшыся, развязаць рамень пасталоў Яго.

⁸ Я хрышчу вас вадой, а Ён будзе хрысціць вас Духам Святым».

⁹ І сталася: у тыя дні прыйшоў Ісус з Назарэта Галілейскага і быў ахрышчаны Янам у Ярдане.

¹⁰ І, як толькі выходзіў з вады, убачыў адкрытыя нябёсы ды Духа, як голуба, што сыходзіў на Яго.

¹¹ І азваўся голас з неба: «Ты – Сын Мой улюбёны, упадабаў Я Цябе».

¹² І зараз вядзе Яго Дух у пустыню.

¹³ І Ён прабыў у пустыні сорак дзён, і выпрабоўваўся шатанам; і жыў побач са звярамі, і анёлы паслугавалі Яму.

¹⁴ А пасля таго, як Ян быў узяты, прыбыў Ісус у Галілею, прапаведуючы добрую вестку Валадарства Божага

¹⁵ і кажучы: «Споўніўся час, і наблізілася Валадарства Божае. Навярніцеся і верце Евангеллю!»

¹⁶ І, праходзячы каля мора Галілейскага, убачыў Сімона і брата яго Андрэя, што закідалі сеткі ў мора; бо былі яны рыбаловамі.

¹⁷ І сказаў ім Ісус: «Ідзіце за Мной, і Я зраблю вас лаўцамі людзей».

¹⁸ І адразу, пакінуўшы сеткі свае, яны пайшлі за Ім следам.

¹⁹ І, адышоўшыся адтуль недалёка, убачыў Якуба Зебядзеева і Яна, брата яго, калі яны парадкавалі сеткі свае ў лодцы.

²⁰ І зараз паклікаў іх. І яны, пакінуўшы ў лодцы бацьку свайго Зебядзея з нанятымі работнікамі, пайшлі за Ім.

²¹ І ўваходзяць у Кафарнаўм. І адразу ў суботу, увайшоўшы ў сінагогу, стаў навучаць.

²² І ўсе дзівіліся з Яго навукі, бо вучыў іх, як Той, Хто мае ўладу, а не як кніжнікі.

²³ І акурат у сінагозе быў чалавек, апанаваны духам нячыстым, і крычаў,

²⁴ кажучы: «Што Табе да нас, Ісус з Назарэта? Прыйшоў загубіць нас? Ведаю, Хто Ты: Святы Божы».

²⁵ Але прыгразіў яму Ісус, кажучы: «Замаўчы і выйдзі з яго!»

²⁶ І нячысты дух, скалануўшы яго і крычучы моцным голасам, выйшаў з яго.

²⁷ І задзівіліся ўсе, ды пыталіся адзін аднаго, кажучы: «Што гэта такое? Ды што за навука гэта новая з уладаю, што загадвае нячыстым духам, і яны слухаюцца Яго?»

²⁸ І хутка разышлася чутка пра Яго па ўсёй Галілейскай краіне.

²⁹ І адразу, выйшаўшы з сінагогі, прыбылі з Якубам і Янам ў дом Сімона і Андрэя.

³⁰ Цешча ж Сімона ляжала ў гарачцы, і адразу кажуць Яму пра яе.

³¹ І, падышоўшы, Ісус падняў яе, узяўшы за руку, і [адразу] пакінула яе гарачка, і яна паслугавала ім.

³² А калі сонца ўжо зайшло і настаў вечар, прыносілі да Яго ўсіх нямоглых і апанаваных дэманамі;

³³ і так увесь горад сабраўся перад дзвярамі.

³⁴ І аздаравіў многіх, якіх розныя хваробы мучылі, і многіх дэманаў выгнаў, ды не дазваляў дэманам гаварыць, што яны ведалі Яго.

³⁵ І досвіткам, вельмі рана ўстаўшы, выйшаў і падаўся ў пустыннае месца і там маліўся.

³⁶ Сімон жа ды тыя, што з Ім былі, пайшлі за Ім.

³⁷ І, калі знайшлі Яго, кажуць Яму: «Усе Цябе шукаюць».

³⁸ А Ён кажа ім: «Пойдзем у бліжэйшыя паселішчы, каб і там вясціць; бо Я дзеля таго прыйшоў».

³⁹ Ды навучаў у сінагогах па ўсёй Галілеі і выганяў дэманаў.

⁴⁰ І прыступіўся да Яго пракажоны, і маліў Яго, упаўшы на калені, кажучы Яму: «Калі хочаш, можаш мяне ачысціць».

⁴¹ І Ісус пашкадаваў яго, і, працягнуўшы руку Сваю, дакрануўся да яго, і гаворыць яму: «Хачу, будзь ачышчаны».

⁴² І, калі Ён сказаў, адразу сышла з яго праказа, і ён ачысціўся.

⁴³ І, пагразіўшы яму, адправіў яго адразу,

⁴⁴ кажучы: «Глядзі, нікому нічога не кажы, але ідзі, пакажыся святару і за ачышчэнне сваё складзі ахвяру, як загадаў Майсей на сведчанне ім».

⁴⁵ Але ён, адышоўшы, пачаў шмат распавядаць ды шырыць слаўную чутку так, што ўжо Ён не мог адкрыта пайсці ў горад, але быў звонку ў бязлюдных мясцінах. І адусюль сыходзіліся да Яго.