ЛІКІ 33 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Гэта месцы прыпынку сыноў Ізраэля, якія выйшлі з Егіпта дружынамі на чале з Майсеем і Ааронам

² і якіх Майсей запісаў па месцы лагераў, з якіх яны па загадзе Госпада выходзілі. Вось гэтыя месцы.

³ Вось, у першы месяц, пятнаццатага дня першага месяца вырушылі сыны Ізраэля з Рамэсаса, у другі дзень Пасхі, ведзеныя рукой Узвышняга на вачах усіх егіпцян,

⁴ калі яны хавалі ўсіх сваіх першародных, забітых Госпадам, калі Ён учыніў суд над іх багамі,

⁵ і расклаліся лагерам у Сукоце.

⁶ А з Сукота прыбылі яны ў Этам, што на самай мяжы пустыні.

⁷ Адтуль вырушыўшы, прыбылі ў Пігахірот, што каля Баал-Сэфона, ды расклаліся лагерам перад Магдолам.

⁸ Выйшаўшы з Пігахірота, перайшлі яны сярэдзінай мора ў пустыню і тры дні ішлі пустыняй, і расклаліся лагерам у Мары.

⁹ А выйшаўшы з Мары, прыбылі ў Элім, дзе было дванаццаць крыніц водных і семдзесят пальмаў; і там расклаліся лагерам.

¹⁰ Выйшаўшы з Эліма, расклаліся лагерам каля Чырвонага мора.

¹¹ А выйшаўшы ад Чырвонага мора, яны расклаліся лагерам у пустыні Сін;

¹² а адтуль выйшаўшы, яны прыбылі ў Дафку.

¹³ А выйшаўшы з Дафкі, яны разлажыліся лагерам у Алусе.

¹⁴ А выйшаўшы з Алуса, паставілі палаткі ў Рэфідыме, дзе не было вады для піцця;

¹⁵ а выйшаўшы з Рэфідыма, яны расклаліся лагерам у пустыні Сінай.

¹⁶ Але яны вырушылі і з пустыні Сінай і прыбылі ў Кіброт-Гатаву;

¹⁷ а вырушыўшы з Кіброт-Гатавы, яны расклаліся лагерам у Асэроце.

¹⁸ А з Асэрота прыбылі ў Рэтму;

¹⁹ а выйшаўшы з Рэтмы, яны сталі лагерам у Рэмон-Парэсе.

²⁰ Выйшаўшы адтуль, яны прыбылі ў Лебну;

²¹ пасля Лебны сталі лагерам у Рэсе;

²² А выйшаўшы з Рэсы, прыбылі ў Каалату,

²³ адкуль выйшаўшы, паставілі палаткі на гары Сэфар.

²⁴ Затым, выйшаўшы ад гары Сэфар, яны прыйшлі ў Араду;

²⁵ адтуль выйшаўшы, сталі лагерам у Мацэлоце.

²⁶ Выйшаўшы з Мацэлота, прыйшлі ў Тагат;

²⁷ пасля Тагата сталі лагерам у Тарэ.

²⁸ Адтуль выйшаўшы, яны паставілі палаткі ў Мэтцы,

²⁹ а пасля Мэткі яны сталі лагерам у Хэсмоне;

³⁰ выйшаўшы з Хэсмоны, прыбылі ў Мацэрот.

³¹ А пасля Мацэрота яны сталі лагерам у Бэнэ-Якане;

³² і, выйшаўшы з Бэнэ-Якана, прыбылі да гары Гадгад;

³³ выйшаўшы адтуль, паставілі палаткі ў Етэбаце.

³⁴ І з Етэбаты прыбылі ў Эброну; а

³⁵ выйшаўшы з Эброны, расклаліся лагерам у Эцыён-Гебэры.

³⁶ Адтуль выбраўшыся, прыбылі ў пустыню Сін, або Кадэс.

³⁷ Выйшаўшы з Кадэса, паставілі палаткі на гары Гор, на самай мяжы зямлі Эдома.

³⁸ Па загадзе Госпада Аарон, святар, узышоў на гару Гор і там памёр у саракавым годзе па выхадзе сыноў Ізраэля з Егіпта, у першы дзень пятага месяца,

³⁹ маючы сто дваццаць тры гады, калі памёр на гары Гор.

⁴⁰ Цар Арада, хананеец, які жыў у Нагэбе, у зямлі Ханаан, пачуў у той час, што прыбылі сыны Ізраэля.

⁴¹ І выйшаўшы з гары Гор, яны сталі лагерам у Салмоне;

⁴² выйшаўшы адтуль, яны прыбылі ў Пунон.

⁴³ З Пунона выйшлі і прыбылі ў Абот.

⁴⁴ З Абота прыбылі ў Еабарым, што на мяжы Мааба.

⁴⁵ А выйшаўшы з Еабарыма, яны паставілі палаткі ў Дыбонгадзе;

⁴⁶ выйшаўшы адтуль, сталі лагерам у Элман-Дэблатаіме.

⁴⁷ А выйшаўшы з Элман-Дэблатаіма, прыбылі пад гару Абарым, насупраць Нэба.

⁴⁸ А выйшаўшы з гор Абарым, прыйшлі на раўніны Мааба, над Ярданам, насупраць Ерыхона;

⁴⁹ там расклаліся лагерам на мясцовасці ад Бэт-Есімота аж да Абэл-Сітыма на раўнінах Мааба.

⁵⁰ Там сказаў Госпад Майсею:

⁵¹ «Загадай сынам Ізраэля і скажы ім: “Калі пяройдзеце раку Ярдан і ўвойдзеце ў зямлю Ханаан, —

⁵² выганіце перад сабою ўсіх жыхароў той зямлі, паламайце ўсіх іх ідалаў ды разбіце ўсе статуі, і ўсе ўзгоркі спусташыце.

⁵³ Завалодайце зямлёй і абжывайцеся на ёй, бо Я даў яе вам ва ўласнасць;

⁵⁴ яе падзяліце паміж вашымі пакаленнямі: большаму пакаленню дайце большую частку, меншаму — меншую; як жэрабя выпадзе, так паміж усімі хай будзе падзелена ўласнасць; па пакаленнях і родах хай будзе яна падзелена.

⁵⁵ Калі ж не захочаце выгнаць жыхароў зямлі гэтай, і калі яны застануцца, будуць яны вам як церні ў вачах вашых і як калючкі ў баках вашых, будуць яны ўціскаць вас у зямлі пражывання вашага;

⁵⁶ і тады, што Я меркаваў ім зрабіць, вам зраблю”».