ЛІКІ 3 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Гэта пакаленні Аарона і Майсея ў дзень, калі прамаўляў Госпад да Майсея на гары Сінай.

² І гэта імёны сыноў Аарона: першародны яго Надаб, потым Абігу, і Элеязэр, і Ітамар:

³ гэта імёны сыноў Аарона, святароў, каб спаўняць святарскую службу.

⁴ Але Надаб і Абігу памерлі перад абліччам Госпада ў пустыні Сінай, прынеслі чужы агонь, і памерлі яны бяздзетныя; і выконвалі святарскую службу перад бацькам сваім, Ааронам, Элеязэр і Ітамар.

⁵ І прамовіў Госпад да Майсея, кажучы:

⁶ «Прывядзі пакаленне Леві і пастаў яго перад Ааронам святаром, каб яны паслугавалі яму

⁷ і рупіліся аб усім, што тычыцца яго і ўсёй грамады ля палаткі сустрэчы, каб выконваць службу пры скініі,

⁸ і каб захоўвалі прыналежнасці палаткі сустрэчы, спаўняючы абавязкі сыноў Ізраэля, выконваючы службу пры скініі.

⁹ І аддай левітаў як дарунак Аарону і сынам яго, каму яны будуць дадзены ад сыноў Ізраэля;

¹⁰ а Аарона і сыноў яго пастаў наглядчыкамі над службаю святарскай. Калі хто чужы прыступіць да службы, той хай будзе пакараны смерцю».

¹¹ І казаў Госпад Майсею, кажучы:

¹² «Вось, Я вылучыў левітаў з сыноў ізраэльскіх замест усіх першародных, якія адкрываюць улонне маці сярод сыноў Ізраэля, таму левіты будуць Маімі.

¹³ Бо Мой кожны першародны з часу, калі ў зямлі Егіпецкай ударыў Я ўсіх пешародных, пасвяціў Я Сабе ўсё, што нараджаецца першародным у Ізраэлі, ад чалавека аж да жывёлы, яны Мае! Я — Госпад!»

¹⁴ І казаў Госпад Майсею ў пустыні Сінай, кажучы:

¹⁵ «Палічы сыноў Леві па сем’ях бацькоў іх і плямёнах, усіх мужчынскага роду ад аднаго месяца і вышэй».

¹⁶ Палічыў іх Майсей, як загадаў Госпад, і былі названы сыны Леві па імёнах іх;

¹⁷ а вось імёны сыноў Леві: Гэрсон, Кагат і Мэрары.

¹⁸ А вось імёны сыноў Гэрсона па родах іх: Лобні і Сямэй;

¹⁹ сыны Кагата па родах іх: Амрам і Ісаар, Геброн і Азіэль;

²⁰ сыны Мэрары па родах іх: Махалі і Мусі. Вось жа гэтыя роды Леві па сем’ях бацькоў іх.

²¹ Ад Гэрсона паходзяць сям’я Лобні і сям’я Сямэя,

²² усіх людзей мужчынскага полу, якіх ад аднаго месяца і вышэй было налічана сем тысяч пяцьсот.

²³ Яны размяшчаюцца лагерам за скініяй на захадзе

²⁴ пад кіраўніцтвам Эліясафа, сына Лаэля;

²⁵ яны ахоўваюць у палатцы сустрэчы саму скінію, палатку, яе пакрыццё, а таксама пакрывала, што нацягваецца пры ўваходзе ў палатку сустрэчы

²⁶ і пакрывала панадворка, а таксама пакрывала, што нацягваецца пры ўваходзе ў панадворак, які акружае скінію і ахвярнік, і вяроўкі, патрэбныя для ўсякай службы.

²⁷ Кагат мае сем’і: Амрама і Ісаара, Геброна і Азіэля; гэта сем’і Кагатавы.

²⁸ Усе мужчынскага роду ад аднаго месяца і вышэй — восем тысяч шэсцьсот — апекавалі скінію.

²⁹ Сем’і сыноў Кагата размясціліся лагерам на паўднёвым баку скініі,

³⁰ і кіраўніком іх быў Элісафан, сын Азіэля.

³¹ І рупіліся яны пра каўчэг, і стол, і падсвечнік, пра ахвярнік і прылады свяцілішча, прызначаныя на службу Божую, і пра пакрывала, і ўсе прыналежнасці ўсякага роду.

³² А кіраўніком над кіраўнікамі сем’яў левітаў быў Элеязэр, сын Аарона святара, ён наглядаў за тымі, што ахоўвалі свяцілішча.

³³ А вось ад Мэрары паходзілі сем’і Махалі і Мусі; гэта сем’і Мэраравы.

³⁴ Усіх мужчынскага полу ад аднаго месяца і вышэй — шэсць тысяч дзвесце;

³⁵ кіраўніком сем’яў Мэрары быў Сурыэль, сын Абігаіля. Яны размясцілі лагер на паўночным баку скініі.

³⁶ Пад аховаю іх былі: дошкі скініі, і жэрдкі, і слупы, і падножжы іх, і ўсе прыналежнасці яе, і ўсё, што мае дачыненне да ўсякага роду службы,

³⁷ і слупы панадворка з усіх бакоў з падножжамі іх, і калкі з вяроўкамі.

³⁸ А з пярэдняга боку скініі, перад палаткай сустрэчы, на ўсход ставілі палаткі Майсей, і Аарон, і сыны яго, якім даручана святыня ад імя сыноў Ізраэля. Калі б хто наблізіўся чужы, мае быць пакараны смерцю.

³⁹ Усіх левітаў, якіх палічыў Майсей па загадзе Госпада, мужчынскага полу ад аднаго месяца і вышэй было дваццаць дзве тысячы.

⁴⁰ І сказаў Госпад Майсею: «Палічы ўсіх першародных мужчынскага полу з сыноў Ізраэлевых у гадах ад аднаго месяца і вышэй, палічы іх агульную колькасць;

⁴¹ і вазьмі левітаў для Мяне як замену ўсіх першародных з сыноў Ізраэлевых, Я — Госпад; і іх жывёлу на замену ўсёй першароднай жывёле сыноў Ізраэлевых».

⁴² Палічыў Майсей, як загадаў Госпад, усіх першародных з сыноў Ізраэлевых,

⁴³ і было ўсіх першародных мужчынскага полу па імёнах іх, ад аднаго месяца і вышэй, дваццаць дзве тысячы дзвесце семдзесят тры.

⁴⁴ І зноў сказаў Госпад Майсею, гаворачы:

⁴⁵ «Вазьмі левітаў на месца ўсіх першародных з сыноў Ізраэлевых разам з жывёлай левітаў на замену іх жывёле; і левіты будуць Маімі. Я — Госпад.

⁴⁶ А як выкуп за гэтых дзвесце семдзесят трох з першародных сыноў Ізраэлевых, што перавышаюць лік левітаў,

⁴⁷ вазьмі па пяць сікляў ад галавы, па вазе сікля святыні; сікль мае дваццаць гераў.

⁴⁸ І дай грошы Аарону і яго сынам як выкуп за тых, што засталіся».

⁴⁹ Дык узяў Майсей выкуп ад тых, што перавышалі лік выкупленых левітамі;

⁵⁰ ад першародных сыноў Ізраэлевых узяў грошай тысячу трыста шэсцьдзесят пяць па вазе сікля святыні.

⁵¹ І аддаў Майсей срэбра выкупу Аарону і сынам, згодна загаду, як сказаў яму Госпад.