ВЫХАД 40 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ І прамовіў Госпад да Майсея, гаворачы:

² «У першы дзень першага месяца паставіш скінію, палатку сустрэчы,

³ і паставіш у ёй каўчэг сведчання, накрый яго пакрывалам; і, калі

⁴ ўнясеш стол, пакладзі на яго тое, што прадпісана па традыцыі, падсвечнік хай стаіць з лямпамі сваімі

⁵ і залаты ахвярнік для каджэння хай стаіць перад каўчэгам сведчання, і памясці пакрывала пры ўваходзе ў скінію,

⁶ а ахвярнік цэласпалення — перад палаткай сустрэчы,

⁷ і пастаў таз між палаткай сустрэчы і ахвярнікам, і напоўні яго вадою.

⁸ І акружы панадворак пакрываламі, і размясці пакрывала ў браме яго.

⁹ І, узяўшы алею намашчэння, памажаш скінію і ўсё, што ў ёй, і асвяці яе з яе пасудзінамі, і будзе яна святыняй.

¹⁰ Памаж таксама ахвярнік цэласпалення і ўсе яго пасудзіны, і асвяці ахвярнік, і будзе ён святым з святых.

¹¹ І памажаш таз з падножжам яго, і асвяці яго.

¹² І прывядзі Аарона і яго сыноў да ўваходу ў палатку сустрэчы; абмытых вадою,

¹³ апрані Аарона ў святыя шаты, намасці і пасвяці яго, каб служыў Мне святаром.

¹⁴ Прывядзі сыноў яго, і апрані ў шаты,

¹⁵ і намасці іх, як намасціў іх бацьку, каб служылі яны Мне святарамі, і намашчэнне іх будзе ім у вечнае святарства ў іх пакаленнях».

¹⁶ І Майсей зрабіў усё, як яму загадаў Госпад; так і зрабіў.

¹⁷ Такім чынам, у першы месяц другога года, у першы дзень месяца паставілі скінію.

¹⁸ І паставіў яе Майсей, і паклаў падножжы, і дошкі, і жэрдкі, і слупы паставіў,

¹⁹ і разбіў палатку над скініяй, накрыўшы яе пакрыццем зверху, як загадаў Госпад Майсею.

²⁰ Ён узяў сведчанне і паклаў яго ў каўчэг, і, прасунуўшы скрозь жэрдкі, накрыў зверху перамольняй.

²¹ І, калі ўнёс каўчэг у скінію, ён павесіў перад ім пакрывала, як загадаў Госпад Майсею.

²² Паставіў і стол у палатцы сустрэчы на паўночным баку скініі перад пакрывалам,

²³ разлажыўшы перад абліччам Госпада па парадку хлябы пакладныя, як загадаў Госпад Майсею.

²⁴ Паставіў і падсвечнік у палатцы сустрэчы насупраць стала ў паўднёвай частцы,

²⁵ размясціўшы лямпы па парадку, як загадаў Госпад Майсею.

²⁶ Паставіў і залаты ахвярнік у палатку сустрэчы перад перамольняй,

²⁷ і на ім спаліў кадзіла з вострых духмяных рэчаў, як загадаў Госпад Майсею.

²⁸ Размясціў і пакрывала ля ўваходу ў скінію,

²⁹ і ахвярнік цэласпалення паставіў перад уваходам у скінію, у палатку сустрэчы, ахвяруючы на ім цэласпаленне і ахвяру, як загадаў Госпад Майсею.

³⁰ Паставіў таксама таз між палаткай сустрэчы і ахвярнікам, напоўніўшы яго вадою;

³¹ і мылі ў ім рукі і ногі свае Майсей, Аарон і сыны яго,

³² калі ўваходзілі ў палатку сустрэчы і набліжаліся да ахвярніка, як загадаў Госпад Майсею.

³³ Паставіў ён і панадворак вакол скініі і ахвярніка, пры яго ўваходзе павесіўшы пакрывала. Такім чынам, Майсей закончыў работу.

³⁴ І воблака накрыла скінію разам з палаткай сустрэчы, і слава Госпада напоўніла скінію.

³⁵ І не мог Майсей увайсці ў палатку сустрэчы, бо спачывала на ёй воблака, і слава Госпада напоўніла скінію.

³⁶ Калі воблака падымалася над палаткай, сыны Ізраэля пускаліся ў дарогу ва ўсякіх абставінах;

³⁷ а калі воблака не падымалася, не пускаліся яны ў дарогу аж да дня, пакуль не падымалася воблака.

³⁸ Бо ўдзень пакрывала скінію воблака Госпада, а ўночы свяціла, быццам бляск агню, на вачах усяго дома Ізраэля ў час усіх іх вандровак.