ВЫХАД 25 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ І сказаў Госпад Майсею, кажучы:

² «Скажы сынам Ізраэля, каб сабралі для Мяне дары; прыміце іх ад кожнага чалавека, які прапануе дар добраахвотна.

³ А вось тыя рэчы, якія вы павінны прыняць: золата, срэбра і медзь,

⁴ і пурпур, і гіяцынт, і чырвань, і вісон, казіную поўсць,

⁵ і шкуры бараноў, пафарбаваныя ў чырвоны колер, і шкуры сінія, і дрэва акацыі,

⁶ алей для каганцоў, вострыя духмяныя рэчывы, каб прыгатаваць алейкі і найсаладзейшае курэнне,

⁷ камяні оніксавыя і самацветы на аздабленне эфода і нагрудніка.

⁸ І хай зробяць Мне святыню, і Я буду жыць паміж іх.

⁹ Усё цалкам адносна скініі, як Я табе пакажу, і ўсе пасудзіны на служэнне ў ёй, зрабіць такім чынам.

¹⁰ Хай зробяць яны каўчэг з дрэва акацыі; даўжыня яго хай мае два локці з паловаю, шырыня — паўтара локця, вышыня таксама паўтара локця.

¹¹ І пакрыйце яго найчысцейшым золатам знутры і звонку; і зрабі вакол яго залаты вянок,

¹² і адальеце да яго чатыры залатыя кольцы, якія ўмацуйце на чатырох ніжніх вуглах каўчэга: два кольцы хай будуць на адным яго баку, і два — на другім.

¹³ Зрабі таксама з дрэва акацыі жэрдкі і пацягні іх золатам.

¹⁴ І прасунь іх у кольцы, што на абодвух баках каўчэга, каб несці яго з іх дапамогаю.

¹⁵ Яны заўсёды будуць заставацца ў кольцах і не будуць ніколі з іх вымацца.

¹⁶ І ўкладзі ў каўчэг сведчанне, якое Я дам табе.

¹⁷ Зрабі таксама перамольню з найчысцейшага золата: даўжыня яе хай мае два з паловаю локці, а шырыня — паўтара локця.

¹⁸ Зрабі таксама двух херубінаў, з золата і чаканнай працы, з абодвух бакоў перамольні,

¹⁹ адзін херубін хай будзе на адным баку, а другі — на другім; зрабі херубінаў на перамольні, на абодвух баках яе.

²⁰ Хай узнімаюць крылы ўгору і закрываюць сваімі крыламі перамольню; і хай яны глядзяць адзін на аднаго, і твары іх будуць звернуты да перамольні,

²¹ якою павінен закрывацца каўчэг, у які пакладзі сведчанне, якое Я дам табе.

²² І буду сустракацца там з табою, па-над перамольняй, паміж двух херубінаў, якія будуць над каўчэгам сведчання, буду гаварыць з табою пра ўсё, што загадаю праз цябе сынам Ізраэля.

²³ Зрабі таксама стол з дрэва акацыі, што мае два локці даўжыні, і локаць у шырыню, і паўтара локця ў вышыню.

²⁴ І пакрый яго найчысцейшым золатам; і зрабі на ім вакол залаты вянок.

²⁵ Таксама зрабі для яго ліштву вышынёю ў чатыры пальцы навокал; зрабі і залаты вянок над ёю.

²⁶ Падрыхтуй чатыры залатыя кольцы і ўмацуй іх на чатырох вуглах для кожнай ножкі таго стала.

²⁷ На ліштве хай будуць залатыя кольцы, каб прасунуць у іх жэрдкі і каб стол можна было насіць.

²⁸ А самі жэрдкі зрабі з дрэва акацыі і аздобі іх золатам, і будуць насіць з іх дапамогаю стол.

²⁹ Прыгатуй і чары, і фіялы, і кратэры, і кіяфы, у якіх патрэбна прыносіць узліванні — з найчысцейшага золата.

³⁰ І кладзі на стол хлябы пакладныя перад абліччам Маім заўсёды.

³¹ Зрабі таксама падсвечнік чаканны з найчысцейшага золата. Падножжа і стрыжань яго, чары і яблыкі з кветкамі хай будуць адлітыя ў адно цэлае.

³² Шэсць галін павінны выходзіць з бакоў, тры галіны з адного боку, і тры — з другога боку.

³³ Тры чары ў форме міндалевага дрэва з яблыкамі і з кветкамі на адной галіне; такім жа чынам тры чары ў форме міндалевага дрэва — на другой галіне, таксама з яблыкамі і кветкамі: хай гэта будзе твор з шасці галін, што павінны выходзіць са стрыжня.

³⁴ А на самім стрыжні свечніка павінны быць чатыры чары у форме міндалёвага дрэва, з яблыкамі і кветкамі.

³⁵ Па адным яблыку — пад кожнымі дзвюмя галінамі ў трох месцах; усіх іх, што выходзяць з аднаго стрыжня, атрымліваецца шэсць.

³⁶ Такім чынам, яблыкі і галіны будуць з ім адным цэлым, і ўсё вычаканена з найчысцейшага золата.

³⁷ Таксама зрабі да яго сем лямп і пастаў іх на падсвечнік, каб асвятлялі пярэдні яго бок.

³⁸ Таксама да яго зробіш шчыпцы для зняцця нагару, і пасудзіны, дзе збіраецца нагар, хай будуць з найчысцейшага золата.

³⁹ З талента найчысцейшага золата трэба зрабіць падсвечнік і ўсе яго прыналежнасці.

⁴⁰ Глядзі, каб зрабіў паводле ўзору, які быў табе паказаны на гары.