ВЫСЛОЎІ 9 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Мудрасць пабудавала сабе дом і выцесала сем калон;

² закалола ахвяры свае, развяла віно і прыгатавала свой стол.

³ Паслала служанак сваіх, каб клікалі ў замак з узвышшаў гарадскіх:

⁴ «Калі ёсць хто просты чалавек, хай прыйдзе да мяне!» А неразумнаму казала:

⁵ «Прыходзьце, ежце хлеб мой і піце віно, якое я развяла для вас;

⁶ пакіньце глупства і жывіце, і хадзіце па дарогах разважлівасці».

⁷ Хто вучыць кпліўца, сам сабе робіць несправядлівасць; а хто ганьбіць бязбожніка, сябе заплямлівае.

⁸ Не ганьбуй насмешніка, каб ён не зненавідзеў цябе, ганьбуй мудрага — і будзе ён цябе любіць.

⁹ Кажы мудраму — і ён стане мудрэйшы, вучы справядлівага — і ён павялічыць веды.

¹⁰ Пачатак мудрасці — страх Госпадаў, а веданне Святога — разважлівасць.

¹¹ Бо праз мяне дні твае павялічацца і прыбавяцца табе гады жыцця.

¹² Калі будзеш мудры — будзеш мудры для самога сябе, кпліўцам будзеш — будзеш сам несці ліха.

¹³ Жанчына бязглуздая — крыклівая, неразумная і што нічога не ведае,

¹⁴ сядзіць яна каля дзвярэй дома свайго на зэдліку і на ўзвышшах горада,

¹⁵ каб заклікаць тых, хто праходзіць па дарозе, і тых, хто ідзе шляхам сваім:

¹⁶ «Хто бязглузды, хай звернецца да мяне». А неразумнаму сказала яна:

¹⁷ «Воды крадзеныя — саладчэйшыя, а схаваны хлеб — смачнейшы».

¹⁸ І не ведае яна, што там цемра і што ў глыбінях апраметнай — госці яе.