ВЫСЛОЎІ 8 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Няўжо гэта не мудрасць усклікае і не разважлівасць падымае голас свой?

² На найвышэйшых вяршынях і на дарозе, на сярэдзіне сцежак стоячы,

³ ля брам пры ўваходзе ў горад, у саміх дзвярах усклікае:

⁴ «О людзі, да вас заклікаю, і кліч мой да сыноў чалавечых.

⁵ Пазнайце, прастакі, мудрасць, а неразумныя — звярніце ўвагу;

⁶ слухайце, бо буду гаварыць пра справы важныя і расчыняцца вусны мае, каб сказаць праўду.

⁷ Праўду выкажа горла маё, а вусны мае праклянуць бязбожніка.

⁸ Усе размовы вуснаў маіх — справядлівыя, няма ў іх ніякай ілжы і крывадушнасці;

⁹ усе яны ясныя для разумных і справядлівыя для тых, хто здабывае веды.

¹⁰ Прыміце настаўленне маё, а не грошы, лепш навучанне, чым адборнае золата.

¹¹ Бо мудрасць лепшая за самацветы, і ўсё, што жадаеш, не можа параўнацца з ёю.

¹² Я, Мудрасць, жыву з Разважлівасцю і знаходжу дасканаласць ведаў.

¹³ Страх Госпадаў — ненавідзець высакамер’е, пыхлівасць, ліхую дарогу, зло, ненавідзець і крывадушныя вусны.

¹⁴ Маё — гэта розум і разважлівасць, разважлівасць — мая, мужнасць — мая.

¹⁵ Праз мяне цары царуюць і валадары выносяць справядлівыя рашэнні;

¹⁶ праз мяне кіраўнікі загадваюць, а магутныя людзі справядлівасць чыняць.

¹⁷ Я люблю тых, хто любіць мяне; і тыя, хто зранку пільнуе мяне, знойдуць мяне.

¹⁸ Са мною — багацце і слава, незнішчальныя скарбы і справядлівасць.

¹⁹ Бо плод мой даражэйшы за золата і золата вышэйшага гатунку, а народжанае мною — за адборнае срэбра.

²⁰ Я хаджу па дарогах справядлівасці і пасярэдзіне сцежак законнасці,

²¹ каб абагаціць тых, хто любіць мяне, і напоўніць іх скарбніцы.

²² Госпад валодае мною ад пачатку дарог Сваіх, перш чым стварыць што-небудзь, спакон вякоў;

²³ ад вечнасці ўзнікла я і ад старадаўніх часоў, перш чым зямля ўзнікла.

²⁴ Яшчэ не існавалі бездані, а я ўжо ўтварылася; яшчэ крыніцы не былі цяжкімі ад водаў;

²⁵ перш, чым узвысіліся горы, раней за ўзгоркі я нарадзілася.

²⁶ Дагэтуль Ён не стварыў зямлю, і палі, і пачатак зямлі ў сусвеце.

²⁷ Калі асноўваў нябёсы, я была там, калі цвёрдым законам і кругам абводзіў бездані,

²⁸ калі воблакі ўстанаўліваў угары, калі ўмацаваліся вытокі бездані,

²⁹ калі мору вызначаў Ён яго мяжу і водам, каб з рубяжоў сваіх не выходзілі, калі паклаў асновы зямлі,

³⁰ я разам з Ім усё рашала ў захапленні, гуляючы перад Ім штодзень,

³¹ гуляючы па крузе зямлі, і радасці мае — быць з сынамі чалавечымі.

³² Такім чынам, цяпер, сыны, слухайце мяне: шчасныя тыя, хто зберагае дарогі мае,

³³ слухайце настаўленне і будзеце мудрымі, і не адкідайце яго.

³⁴ Шчасны чалавек, які слухае мяне, і які штодзень пільнуе пры дзвярах маіх, і хто пільнуе каля вушака дзвярэй маіх.

³⁵ Хто мяне знойдзе, той жыццё знойдзе і атрымае радасць ад Госпада.

³⁶ А хто адносна мяне зграшыць, той пакалечыць душу сваю: усе, хто ненавідзіць мяне, — смерць любяць».