ВЫСЛОЎІ 7 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Сыне мой, беражы размовы мае і пастановы мае схавай у сабе.

² Спаўняй настаўленні мае, каб жыў; захоўвай закон мой, як зрэнку вока свайго.

³ Завяжы іх на пальцах сваіх, напішы іх на табліцы сэрца свайго.

⁴ Кажы мудрасці: «Ты сястра мая» і разважлівасць заві сяброўкай,

⁵ каб захавала яна цябе ад чужой жонкі і ад чужой жанчыны, што гаворыць свае салодкія словы.

⁶ Бо праз акно дома свайго, праз краты гляджу я і назіраю за маладымі;

⁷ бачу я сярод моладзі юнака неразумнага,

⁸ які ідзе па вуліцы каля яе вугла і ідзе паблізу дарогі да дому яе,

⁹ упоцемку, калі дзень падыходзіць да вечара, у самай імгле і ў тумане.

¹⁰ І вось спяшаецца яму насустрач жанчына ў распусным адзенні і з хітрым сэрцам,

¹¹ гаваркая і нястрыманая, што не выносіць супакой і не можа ўтрымаць ног сваіх у хаце сваёй:

¹² то на плошчах, то на вуліцах каля вуглоў расстаўляе яна пасткі.

¹³ І мілуе яна схопленага і расцалаванага юнака, з юрлівым тварам гаворачы:

¹⁴ «Я прынесла ахвяру на здароўе, сёння я выканала зарокі свае,

¹⁵ таму выйшла табе насустрач, жадаючы цябе бачыць, — і знайшла цябе.

¹⁶ Дыванамі заслала я сваю пасцель, тканінамі рознакаляровымі з Егіпта,

¹⁷ Апрыскала я спальню сваю мірай, альясам і карыцаю.

¹⁸ Прыходзь, будзем упівацца ўцехамі, да раніцы цешыцца любоўю.

¹⁹ Бо няма мужа ў доме маім, пусціўся ў вельмі далёкую дарогу;

²⁰ пояс грошай узяў з сабою, вернецца ён да дому свайго ў дзень поўні».

²¹ Прывабіла яна яго шматлікімі размовамі і заманіла яго ліслівасцю вуснаў сваіх.

²² Бязглузды, ідзе ён за ёй, як вол, якога вядуць на зарэз; як алень заблытваецца ён ў сіле,

²³ пакуль страла не пранзае печань яго; як птушка, што спяшаецца да сіла і не ведае, што рашаецца справа жыцця.

²⁴ Такім чынам, цяпер, сыне мой, слухай мяне і зважай на размовы вуснаў маіх.

²⁵ Хай не ўтрымаецца розум твой на дарогах яе, і хай не падманваюць цябе сцежкі яе,

²⁶ бо многіх зваліла яна параненымі, і нават вельмі моцныя людзі былі загубленыя ёю:

²⁷ дом яе — дарогі ў пекла, што вядуць у глыбіні смерці.