ВЫСЛОЎІ 5 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Сыне мой, звярніся да мудрасці маёй і нахілі вуха сваё да разважлівасці маёй,

² каб зберагчы думкі і каб вусны твае захавалі настаўленне.

³ Бо вусны распусніцы сочацца мёдам, а горла яе больш бліскучае, чым алей;

⁴ а ў рэшце рэшт — яно ў яе горкае, быццам палын, і вострае, быццам двусечны меч.

⁵ Ногі яе сыходзяць да смерці, а крокі яе вядуць да мерцвякоў;

⁶ паколькі не заўважае яна сцежку жыцця, хісткія крокі яе і сама яна не ведае [іх].

⁷ Вось, зараз паслухай, мой сыне, не адступай ад слоў вуснаў маіх.

⁸ Трымай далёка ад яе шлях твой і не падыходзь блізка да дзвярэй дому яе.

⁹ Не аддавай гонару свайго чужым і гадоў сваіх — лютаму чалавеку,

¹⁰ каб часам з намаганняў тваіх не насычаліся іншыя і каб працы твае не былі ў чужой хаце,

¹¹ а ў рэшце рэшт ты будзеш стагнаць, калі сілы твае і цела тваё будуць растрачаныя,

¹² і ты скажаш: «Чаму пагрэбаваў я настаўленнем, і сэрца маё адхіліла папрокі,

¹³ і не пачуў я голасу тых, хто вучыў мяне, і не нахіляў вуха маё да настаўнікаў?

¹⁴ Ледзь не трапіў я ў вялікую бяду сярод сходу і грамадства!»

¹⁵ Пі ваду са свайго вадаёма і тую, што цячэ ў тваёй студні,

¹⁶ хай не выліваюцца крыніцы твае на двор, а патокі водаў — па вуліцах;

¹⁷ валодай імі толькі ты адзін, і хай не будуць саўдзельнікамі тваімі іншыя.

¹⁸ Хай выток твой будзе дабраславёны, і весяліся з жонкай маладосці тваёй.

¹⁹ Яна — лань найпрыгажэйшая і сарна зграбнейшая, прывабнасці яе ап’яняюць цябе ў кожны час, у каханні яе бесперапынна шукай асалоду.

²⁰ Нашто, сыне мой, ты спакушаешся чужою і грэешся ў абдымках чужой?

²¹ Бо перад Госпадам — дарогі чалавека і Ён бачыць крокі яго.

²² Бязбожніка захопяць яго ўласныя несправядлівасці, і будзе ўтрыманы ён грахамі сваімі.

²³ Памрэ ён, бо не меў настаўлення, і знікне ў безлічы бязглуздасці сваёй.