ВЫСЛОЎІ 4 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Слухайце, дзеці, бацькоўскае настаўленне і слухайце, каб навучыцца разважлівасці;

² я дам вам добрае навучанне, не пагарджайце запаветам маім.

³ Бо і я быў сынам бацькі майго, пешчаны і адзіны — у маці маёй;

⁴ вучыў ён мяне і казаў мне: «Хай прымае сэрца тваё словы мае, беражы настаўленні мае — і будзеш жыць.

⁵ Набывай мудрасць, набывай разважлівасць, не забывайся і не ўхіляйся ад слоў вуснаў маіх.

⁶ Не пакідай яе, і яна зберажэ цябе, любі яе, а яна выратуе цябе.

⁷ Пачатак мудрасці: валодай мудрасцю і набывай разважлівасць ва ўсякай тваёй маёмасці.

⁸ Набывай яе, і яна ўзвысіць цябе, яна праславіць цябе, калі будзеш любіць яе.

⁹ Ускладзе на галаву тваю вянок ласкі, абароніць цябе ўслаўленым вянцом».

¹⁰ Слухай, сыне мой, і ўспрымай словы мае, каб памножыліся гады жыцця твайго.

¹¹ Паказаў я табе шлях мудрасці; вяду цябе сцежкамі справядлівымі,

¹² калі ўступіш на іх, не будуць сціснутыя крокі твае, і, калі пабяжыш, не сустрэнеш перашкоду.

¹³ Трымай настаўленне і не адпускай яго; беражы яго, бо яно — жыццё тваё.

¹⁴ Не ўступай на сцежкі бязбожнікаў і не хадзі па дарозе ліхіх людзей.

¹⁵ Пазбягай яе і не хадзі па ёй; ухіляйся і адступіся ад яе.

¹⁶ Бо не спяць яны, пакуль благога не зробяць, і сон іх не ахоплівае, калі не дадуць камусьці падножку.

¹⁷ Бо ядуць яны хлеб бязбожнасці і п’юць віно несправядлівасці.

¹⁸ А сцежка справядлівых — быццам святло ззяючае ўзыходзіць і расце аж да поўнага дня.

¹⁹ Шлях бязбожнікаў — цёмны, і не ведаюць яны, дзе зваляцца.

²⁰ Сыне мой, слухай уважліва размовы мае і схіляй вуха сваё да размоў маіх;

²¹ хай не знікаюць яны з вачэй тваіх, беражы іх у глыбіні сэрца свайго;

²² бо яны — жыццё для тых, хто знаходзіць іх, і здароўе — для ўсяго цела.

²³ Усялякім наглядам сцеражы сэрца сваё, бо з яго жыццё ўзнікае.

²⁴ Адхілі ад сябе крывадушны язык, і хай будуць далёка ад цябе шкодныя вусны.

²⁵ Вочы твае хай глядзяць прама, а павекі хай накіраваны будуць перад сабой.

²⁶ Сачы за сцежкай ног тваіх, і ўсе дарогі твае будуць цвёрдыя.

²⁷ Не паварочвай ані направа, ані налева, беражы нагу сваю ад ліха.