ВЫСЛОЎІ 30 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Словы Агура, сына Яка з Масы. Выказванне гэтага чалавека да Ітыэля, да Ітыэля і Укала.

² Вось, я найбольшы невук з людзей і мудрасці чалавечай няма ў мяне;

³ і не навучыўся я мудрасці, і не пазнаў ведаў святых.

⁴ Хто ўзыходзіць на неба і сыходзіць? Хто збірае вецер у руках сваіх? Хто сабраў воды, быццам у вопратку? Хто паставіў усе межы зямлі? Якое імя Яго і якое імя Яго сына, ці ведаеш ты?

⁵ Кожнае слова Бога — гэта надзейны шчыт для тых, хто ўскладае на яго надзею.

⁶ Не дадавай нічога да слоў Яго, каб Ён не выкрыў цябе і каб не стаўся ты лгуном.

⁷ Прашу ад цябе дзвюх рэчаў, не адмаўляй мне, раней, чым памру:

⁸ надоўга адхілі ад мяне марнасць і хлуслівыя словы, не давай мне беднасці і багацця, толькі ўдзяляй мне штораз на пражыццё хлебны паёк,

⁹ каб, наеўшыся, не быў я спакушаны адрачэннем і не сказаў: «Хто гэта — Госпад?», або, беднасцю прымушаны, каб не краў я і каб не лгаў я імем Бога майго.

¹⁰ Не дакарай паслугача перад яго гаспадаром, каб часам не пракляў ён цябе і каб не быў ты пакараны.

¹¹ Ёсць род, што бацьку свайго праклінае і што не дабраслаўляе маці сваю.

¹² Ёсць род, які здаецца сабе чыстым, але не адмыты ад бруду свайго.

¹³ Ёсць род — як узвысіліся вочы яго і ўзняліся ўгару павекі яго!

¹⁴ Ёсць род, які мае мечы замест зубоў, а сківіцы яго — нажы, каб пажэрці бедных з зямлі і ўбогіх — з людзей.

¹⁵ П’яўка мае дзве дачкі: «Прынясі, прынясі». Тры рэчы ёсць ненасытныя, і чатыры, што ніколі не кажуць: «Досыць!»:

¹⁶ пекла і бясплоднае чэрава, зямля, што не насычаецца вадою, агонь, што ніколі не кажа: «Даволі!»

¹⁷ Вока, што кпіць з бацькі і што адцураецца паслушэнства маці — хай крумкачы з-за ракі выдзеўбаюць яго і хай з’ядуць яго дзеці арла.

¹⁸ Тры рэчы занадта складаныя для мяне, а чатыры я зусім не ведаю:

¹⁹ дарогу арла па небе, дарогу змяі па скале, дарогу карабля ў сярэдзіне мора, дарогу мужчыны да маладзенькай дзяўчыны.

²⁰ Так паступае жанчына-чужаложніца, што з’ела, абцёрла вусны і кажа: «Я нічога благога на зрабіла».

²¹ Пад трыма рэчамі дрыжыць зямля, а чатырох перанесці не можа:

²² пад слугою, калі ён будзе правіць; пад бязглуздым, калі ён будзе насычаны ежай;

²³ пад пагарджанай жанчынай, калі яе возьмуць за жонку; і пад служанкай, калі яна будзе спадчынніцай гаспадыні сваёй.

²⁴ Ёсць на зямлі чатыры самыя малыя істоты, але яны мудрэйшыя за мудрых:

²⁵ мурашкі — народ не моцны, які рыхтуе сабе ежу ў жніво;

²⁶ горныя мышы — народ слабы, які ставіць жыллё сваё на скале;

²⁷ саранча — не мае цара і выступае ўся яна чарадою;

²⁸ яшчарка — караскаецца на лапках, а спыняецца ў пакоях цара.

²⁹ Ёсць тры рэчы, што ходзяць добра, і чатыры, што крочаць шчасліва:

³⁰ леў, самы моцны са звяроў, не пабаіцца сустрэчы ні з кім;

³¹ певень, што падперазаўся, і баран, і цар, які мае з сабою войска.

³² Калі ты зрабіў глупства, ды ўзнёсся сам над сабой; ці падумаў ліхое — ускладзі руку на вусны свае!

³³ Бо хто добра ўзбівае малако — атрымлівае масла, а хто моцна высмарквае ноздры — выклікае кроў, а хто выклікае гнеў — выклікае сваркі.