ВЫСЛОЎІ 3 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Сыне мой, не забывайся на закон мой, і хай сэрца тваё беражэ прыказанні мае;

² бо яны табе прыбавяць працягласць дзён, гады жыцця і супакой.

³ Хай міласэрнасць і праўда не пакідаюць цябе; абвяжы імі шыю сваю і запішы на скрыжалях сэрца свайго,

⁴ і знойдзеш ты ласку і спагаду ў вачах Бога і людзей.

⁵ Спадзявайся на Госпада ад усяго сэрца свайго і не спадзявайся на разважлівасць сваю.

⁶ Думай аб Ім на ўсіх шляхах тваіх, і Ён накіруе крокі твае.

⁷ Не будзь мудрацом перад самім сабою; шануй Бога і пазбягай ліха,

⁸ бо гэта будзе здароўем для цела твайго і падсілкоўваннем для касцей тваіх.

⁹ Ушаноўвай Госпада ад усёй маёмасці тваёй і ад пачаткаў усіх пладоў тваіх,

¹⁰ і напоўняцца свірны твае збожжам, а давільні твае будуць багатыя на віно.

¹¹ Не адкідай, сыне мой, настаўленне Госпадава і не пагарджай ім, калі Ён будзе караць цябе,

¹² бо каго любіць Госпад — таго карае і, як бацька, спагадае сыну Свайму.

¹³ Шчасны чалавек, які знайшоў мудрасць і які звярнуўся да разважлівасці:

¹⁴ набыццё яе лепш за гандаль срэбрам, а прыбытак — хутчэй, чым ад золата.

¹⁵ Яна каштоўнейшая за ўсе самацветы; і не могуць з ёй параўнацца ніякія твае каштоўнасці;

¹⁶ працягласць дзён — у яе правай руцэ, а ў яе левай руцэ — багацце і слава.

¹⁷ Дарогі яе — дарогі прыгожыя, і ўсе яе сцежкі — мірныя.

¹⁸ Яна — дрэва жыцця для тых, хто авалодвае ёю, і шчасны той, хто трымаецца яе.

¹⁹ Госпад мудрасцю заснаваў зямлю, нябёсы ўмацаваў разважлівасцю;

²⁰ з Яго мудрасці парасчыніліся бездані і аблокі струменяцца расою.

²¹ Сыне мой, не ўпускай іх з вачэй сваіх; беражы разважлівасць і розум —

²² і будзе жыццё для душы тваёй і ласка для шыі тваёй;

²³ тады пойдзеш упэўнена па дарозе сваёй і нага твая не спатыкнецца.

²⁴ Калі заснеш, не будзеш мець страху, будзеш адпачываць — і сон твой будзе прыемны.

²⁵ Не бойся раптоўнага страху і збянтэжанасці, што ахоплівае цябе з-за бязбожнікаў, калі яна прыйдзе.

²⁶ Бо Госпад будзе на тваім баку і захавае нагу тваю, каб цябе не захапілі.

²⁷ Не адмаўляй у дабрадзействе таму, каму яно патрэбна, калі ва ўладзе рукі тваёй, каб ты зрабіў гэта.

²⁸ Не кажы сябру свайму: «Ідзі і прыйдзі зноў, заўтра дам табе», — калі можаш даць зараз.

²⁹ Не задумвай ліха супраць сябра свайго, калі ён з даверам сядзіць побач з табою.

³⁰ Не сварыся з чалавекам без прычыны, калі ён сам не зрабіў табе нічога благога.

³¹ Не зайздросці чалавеку несправядліваму і не наследуй шляхам яго,

³² бо агіднасць для Госпада — усякі крывадушны чалавек, а з сумленнымі — сяброўства Яго.

³³ Праклён Госпада — на доме бязбожніка, а жыллё справядлівых будзе Ім дабраслаўляцца.

³⁴ Ён Сам пасмяецца з кпліўцаў і дасць ласку пакорлівым;

³⁵ мудрыя будуць мець славу, веліч бязглуздых — ганьба.