ВЫСЛОЎІ 29 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Чалавек, які з цвёрдай шыяй пагарджае абвінавачваннямі, — раптам будзе знішчаны, і без вылячэння.

² З памнажэння справядлівых узвесяліцца народ; а ў валадаранне бязбожніка народ будзе стагнаць.

³ Чалавек, які любіць мудрасць, радуе бацьку свайго; а хто корміць распуснікаў — згубіць маёмасць.

⁴ Цар у справядлівасці ўзвышае дзяржаву; чалавек, што прымае падарункі, разбурыць яе.

⁵ Хто ліслівіць падманна блізкаму, ставіць сіло на ногі яго.

⁶ У граху несправядлівы чалавек захопліваецца пасткай, а справядлівы ўзрадуецца і ўзвесяліцца.

⁷ Справядлівы ведае справу бедных, а бязбожнік не мае ведаў.

⁸ Людзі небяспечныя горад раз’ядноўваюць, а мудрыя — утаймоўваюць абурэнне.

⁹ Мудры чалавек, калі паспрачаецца ў судзе з бязглуздым, — хай гневаецца ён, хай смяецца, — не знойдзе супакою.

¹⁰ Крыважэрныя ненавідзяць чыстасардэчнага; а справядлівыя рупяцца пра жыццё яго.

¹¹ Бязглузды выяўляе ўвесь свой гнеў, а мудры ўціхамірвае яго.

¹² Кіраўнік, калі ахвотна слухае словы маны, мае ўсіх слуг — бязбожнікаў.

¹³ Бедны сустракаецца з прыгнятальнікам, але Госпад дае святло для вачэй абаіх.

¹⁴ Цар, што па праўдзе судзіць бедных, — пасад яго будзе ўмацаваны назаўсёды.

¹⁵ Дубец і выкрыванне даюць мудрасць; а юнак, які пакідаецца на сваю волю, асаромлівае маці сваю.

¹⁶ У мностве бязбожнікаў будуць множыцца злачынствы, і справядлівыя ўбачаць іх пагібель.

¹⁷ Навучай свайго сына: ён і супакоіць цябе, і дасць асалоду душы тваёй.

¹⁸ Калі не хапае зроку, народ будзе раз’яднаны; шчасны, хто беражэ законнасць.

¹⁹ Словамі не можа быць навучаны слуга, бо разумее і пагарджае адказам.

²⁰ Бачыў ты чалавека спрытнага ў размове? Неразумны будзе мець надзею больш за яго.

²¹ Хто гадуе з дзяцінства слугу свайго ў раскошы, той потым зведае яго жаданне стаць і сынам.

²² Гняўлівы чалавек узбуджае сваркі, а той, хто ахвочы на гнеў, будзе болей схільны да граху.

²³ Пыхлівасць чалавека панізіць яго, а пакорлівы духам здабудзе славу.

²⁴ Хто дзеліцца са злодзеем — ненавідзіць душу сваю; чуе ён праклён, але і не выказвае гэтага.

²⁵ Страх перад чалавекам ставіць пастку, а хто ўскладае надзею на Госпада — будзе падтрыманы.

²⁶ Многія шукаюць прыхільнасці кіраўніка, а суд для кожнага паходзіць ад Госпада.

²⁷ Справядлівыя грэбуюць бязбожным чалавекам; а бязбожнікі грэбуюць тымі, хто на вернай дарозе.