ВЫСЛОЎІ 24 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Не зайздросці людзям ліхім, не жадай іх таварыства;

² бо думаюць яны пра гвалт, іх вусны гавораць зласліва.

³ Мудрасцю будзе пабудаваны дом, а разважлівасцю — умацуецца.

⁴ З ведамі запоўняцца кладоўкі ўсякаю каштоўнаю і найпрыгажэйшаю маёмасцю.

⁵ Чалавек мудры — моцны, а вучоны чалавек узмацняе моц [сваю].

⁶ Бо ты будзеш рыхтаваць для сябе вайну ў адпаведнасці з планамі — і будзе перамога, дзе многія парады.

⁷ Завысокая мудрасць — для бязглуздага, у браме вуснаў сваіх не адчыніць.

⁸ Хто думае зрабіць ліха, таго назавуць зламыснікам.

⁹ Думка бязглуздага — грэх, і агіднасць для людзей — паклёпнік.

¹⁰ Калі ты ў дзень няшчасця кволы — паменшыцца твая моц.

¹¹ Ратуй тых, каго вядуць на смерць, і затрымай тых, каго цягнуць на пагібель.

¹² Ці скажаш: «Я не ведаў гэтага»? Ці ж Той, Хто праглядае сэрца, Сам не разумее? Ведае Той, Хто сочыць за душамі, Ён адплачвае кожнаму за справы яго.

¹³ Сыне мой, ты ясі мёд, бо ён добры, бо соты — найсаладзейшыя для горла твайго.

¹⁴ Так, ведай, ёсць мудрасць для душы тваёй: калі ты знойдзеш яе — будзе ў цябе будучыня і надзея твая не загіне.

¹⁵ Не строй падкопы, о нягоднік, дому справядлівага, і не парушай спакою яго.

¹⁶ Бо справядлівы сем разоў упадзе і ўзнімецца; а бязбожнікі ўпадуць у ліха.

¹⁷ Калі гіне непрыяцель твой — не радуйся; і хай не ўзрадуецца ў пагібелі яго сэрца тваё,

¹⁸ каб падчас не ўбачыў Госпад і не спадабаўся ён Яму, і каб не адхіліў Ён гневу Свайго ад яго.

¹⁹ Не абурайся на ліхадзеяў і бязбожнікам не зайздросці,

²⁰ бо не будзе будучыні ў ліхога і светач бязбожнікаў патухне.

²¹ Бойся, сыне мой, Госпада і цара, і не далучайся да тых, хто думае інакш,

²² бо раптам надыдзе пагібель на іх, а пагібель ад іх абаіх хто прадбачыць?

²³ І гэта таксама ёсць у мудрых: вылучаць чалавека на судзе — нядобра.

²⁴ Хто кажа бязбожніку: «Ты справядлівы», таго будуць праклінаць народы, таго адхіляць плямёны.

²⁵ А хто выкрывае яго — будзе праслаўлены, і прыйдзе на іх дабраславенне дабра.

²⁶ У вусны цалуе той, хто адказвае вернымі словамі.

²⁷ Рыхтуй справу сваю знадворку і старанна выконвай яе на сваёй ніве, каб потым пабудаваць дом свой.

²⁸ Не будзь сведкам супраць блізкага твайго беспадстаўна і не падманвай нікога вуснамі сваімі.

²⁹ Не кажы: «Як ён мне зрабіў, так і я адплачу чалавеку за справу яго».

³⁰ Праходзіў я праз поле лянівага чалавека і праз вінаграднік чалавека, пазбаўленага розуму:

³¹ і вось — усё запаланіла крапіва, і цярноўнік пакрыў паверхню яго, і агароджа каменная была разбурана;

³² калі я гэта ўбачыў, захаваў у сэрцы сваім, я ўбачыў — і вывучыў настаўленне:

³³ «Крыху паспіш, у меру падрэмлеш, крыху рукі зложыш, каб адпачыць,

³⁴ і прыйдзе да цябе беднасць, як скараход, і галеча — як чалавек узброены».