ВЫСЛОЎІ 21 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Сэрца цара ў руцэ Госпада — як ручаі водаў: Ён паверне яго, куды пажадае.

² Усякая дарога чалавека здаецца яму вернай, але Госпад узважвае сэрцы.

³ Тварыць міласэрнасць і законнасць больш падабаецца Госпаду, чым крывая ахвяра.

⁴ Гордасць вачэй і фанабэрыстасць сэрца — светач бязбожнікаў — грэх.

⁵ Намеры кемлівага — заўсёды для прыбытку, а ўсякі паспешлівы — заўсёды ў галечы.

⁶ Хто збірае скарбы падманным языком, той будзе кінуты ў пасткі смерці.

⁷ Раз’ятранасць бязбожнікаў скіне іх, бо не пажадалі яны тварыць законнасць.

⁸ Нясталы шлях — чужы для чалавека; а хто чысты, таго справа верная.

⁹ Лепей сядзець у кутку гарышча, чым са сварлівай [жонкай] — у агульным доме.

¹⁰ Душа бязбожніка жадае ліха; над ім не злітуецца блізкі яго.

¹¹ Калі пакараюць насмешніка, просты чалавек паразумнее; а калі вучаць мудрага — ён набудзе веды.

¹² Справядлівы назірае за домам бязбожніка: як упадаюць бязбожныя у няшчасце.

¹³ Хто вуха сваё затыкае на лямант беднага, той і сам будзе лямантаваць, але не будзе выслуханы.

¹⁴ Падарунак патаемны спыняе гнеў, а падарунак за пазухай — найвялікшае абурэнне.

¹⁵ Тварыць законнасць — гэта радасць для справядлівага і пагібель для тых, хто чыніць несправядлівасць.

¹⁶ Чалавек, які сыдзе з дарогі разважлівасці, прабудзе на сходзе мёртвых.

¹⁷ Хто любіць балі — будзе ў галечы, не ўзбагаціцца, хто любіць віно і тлустую ежу.

¹⁸ Збаўленне за справядлівага — бязбожнік, а за прастадушных — несправядлівы.

¹⁹ Лепей жыць на пустыннай зямлі, чым з жонкай сварлівай і запальчывай.

²⁰ Жаданы скарб і тлушч у жыллі мудрага, а неразважлівы чалавек прамантачыць яго.

²¹ Хто ідзе ўслед за справядлівасцю і міласэрнасцю, той знойдзе жыццё, і справядлівасць, і славу.

²² Уваходзіць мудры ў горад дужых і знішчае цытадэль іх упэўненасці.

²³ Хто беражэ вусны свае і язык свой, той беражэ душу сваю ад бед.

²⁴ Пыхлівы і фанабэрысты завецца насмешнікам, што дзейнічае ў пыхлівым гневе.

²⁵ Жаданні гультая забіваюць, бо рукі яго не жадаюць нічога рабіць:

²⁶ увесь дзень ён жадае і прагне; а справядлівы — той, хто раздае і не шкадуе.

²⁷ Ахвяры бязбожнікаў — агідныя, тым болей, што прапаноўваюцца яны са злачынства.

²⁸ Ілжэсведка загіне, чалавек пакорлівы будзе гаварыць на перамогу.

²⁹ Бязбожны чалавек упарціцца ў поглядзе сваім; а той, хто верны, — выпраўляе дарогу сваю.

³⁰ Няма мудрасці, ані разважлівасці, ані законнасці супраць Госпада.

³¹ Каня рыхтуюць на дзень вайны, але выратоўвае Госпад.