ВЫСЛОЎІ 2 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Сыне мой, калі прымеш размовы мае і схаваеш у сябе запаветы мае,

² накіроўваючы вуха сваё да мудрасці, схіляючы сэрца сваё да пазнання разважлівасці,

³ бо калі прызавеш мудрасць і ўручыш голас свой разважлівасці,

⁴ калі шукаць яе будзеш, як грошы, ды адшукваць яе будзеш, як скарб, —

⁵ тады зразумееш страх Госпадаў і знойдзеш пазнанне Бога,

⁶ бо Госпад дае мудрасць, і з вуснаў Яго — веды і разважлівасць.

⁷ Ён запасе мудрасць для справядлівых і будзе шчытом для тых, хто ходзіць простым шляхам,

⁸ захоўваючы сцежкі справядлівасці і пільнуючы дарогі святых.

⁹ Тады зразумееш справядлівасць, прыказанне і закон і ўсякую добрую сцежку,

¹⁰ бо ўвойдзе мудрасць у сэрца тваё, і веды спадабаюцца душы тваёй.

¹¹ Сумленне будзе пільнаваць цябе, а растаропнасць уратуе цябе,

¹² каб усцярогся ты ад дарогі ліхой і ад чалавека, які хлусіць,

¹³ [пазбавіць ад тых,] хто пакідае дарогу простую, каб хадзіць па цёмных дарогах,

¹⁴ [ад тых,] хто весяліцца, калі робіць злачынства, і радуецца з найгоршых рэчаў:

¹⁵ дарогі іх нясталыя, а крокі іх блудныя;

¹⁶ каб усцярогся ты ад чужой жонкі і ад чужой, якая змякчае свае размовы

¹⁷ і якая пакінула правадыра маладосці сваёй і забылася на запавет Бога свайго.

¹⁸ Бо дом яе нахіліўся да смерці, а шляхі яе — да пекла;

¹⁹ усе, што ідуць да яе, не вяртаюцца і не знаходзяць сцежак жыцця.

²⁰ Такім чынам, хадзі шляхам добрых людзей і трымайся сцежак справядлівых людзей:

²¹ бо той, хто справядлівы, будзе жыць на зямлі і сумленныя назаўсёды застануцца на ёй;

²² а бязбожнікі будуць сцёрты з зямлі і тыя, што дзейнічаюць несправядліва, будуць выкаранены з яе.