ВЫСЛОЎІ 18 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Зручных выпадкаў шукае той, хто жадае пазбавіцца сябра; раздражняе яго ўсякая парада.

² Бязглузды не адчувае асалоду ад разважлівасці — а толькі ад паказу ўласнага розуму.

³ Калі прыйдзе бязбожнік — прыйдзе і пагарда, а з ганьбай — знявага.

⁴ Словы з вуснаў чалавека — глыбокая вада, а крыніца мудрасці — багатая плынь.

⁵ Нядобра прымаць чалавека бязбожнага, каб пахіснуць справядлівага ў законнасці яго.

⁶ Вусны бязглуздага змешваюцца са сваркамі, а рот яго выклікае пабоі.

⁷ Рот бязглуздага — яго пагібель, а вусны яго — пастка для душы яго.

⁸ Словы плеткара — быццам салодкія, і самі даходзяць да глыбіні чэрава.

⁹ Той, хто ў працы сваёй млявы і нядбайны, той — брат знішчыцеля.

¹⁰ Наймацнейшая цытадэль — імя Госпада; да яе спяшаецца справядлівы, і там ён узвысіцца.

¹¹ Маёмасць багатага — трывалы горад яго, яна — быццам мур высокі ў думцы яго.

¹² Перад знішчэннем узвышаецца сэрца чалавечае, і перад услаўленнем — уціхамірваецца.

¹³ Хто спярша гаворыць, а потым слухае, — таму бязглуздасць і ганьба.

¹⁴ Дух чалавечы пераносіць немач сваю, але хто зможа падтрымаць зруйнаваны дух?

¹⁵ Сэрца разважлівае будзе валодаць ведамі, і вуха мудрых шукае ведаў.

¹⁶ Дар чалавека пашырае дарогу яго і да кіраўнікоў даводзіць яго.

¹⁷ Хто першы гаворыць у спрэчцы — лічыцца справядлівым, а прыходзіць сябар яго і выкрые яго.

¹⁸ Жэрабя спыняе спрэчкі і таксама вырашае паміж магутнымі.

¹⁹ Брат, якога абражаюць, мацнейшы за моцны горад, а сваркі — як крэпасці гарадоў.

²⁰ З плода вуснаў чалавека насыціцца чэрава яго, а спараджэнні ўласных вуснаў уволю накормяць яго.

²¹ Смерць і жыццё ў руцэ языка; хто яго любіць — будзе есці плады яго.

²² Хто знайшоў добрую жонку — знайшоў дабро і атрымаў ласку ад Госпада.

²³ Калі бедны гаворыць з маленнямі, то багаты будзе гаварыць жорстка.

²⁴ Чалавек можа быць паранены сябрамі, але ёсць сябар, які бліжэй за брата.