ВЫСЛОЎІ 13 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Мудры сын любіць настаўленне бацькі, насмешнік не слухае, калі яго ганяць.

² З плода вуснаў сваіх чалавек жывіцца дабром, а душа крывадушніка — гвалтам.

³ Хто вусны свае беражэ — беражэ душу сваю, а хто летуценны ў размове, — таму бяда.

⁴ Гультай хоча, а не мае, а душа працавітых насыціцца.

⁵ Справядлівы адмовіцца ад ілжывага слова, а бязбожнік сарамаціць і ганьбіць.

⁶ Справядлівасць беражэ бязгрэшнага ў дарозе, а бязбожнасць ставіць падножку грэшніку.

⁷ Ёсць той, хто быццам лічыцца за багача, хаця нічога не мае; і ёсць той, хто быццам лічыцца за беднага, хаця ў яго багацця шмат.

⁸ Выкуп душы чалавека — яго багацце, а хто бедны — не вытрымлівае папроку.

⁹ Святло справядлівых весяліць, а каганец бязбожнікаў тухне.

¹⁰ Між пыхліўцаў — толькі сваркі, а ў пакорлівых — мудрасць.

¹¹ Маёмасць ад марнасці паменшыцца, а хто збірае ў руку — памнажае.

¹² Надзея, што доўга не здзяйсняецца, вынішчае душу, а жаданне, што здзяйсняецца, — дрэва жыцця.

¹³ Хто пагарднае словам робіць, той сам прычыняе шкоду сабе; а хто паважае пастанову, таму адплаціцца.

¹⁴ Закон мудрага — крыніца жыцця, каб пазбегнуць путаў смерці.

¹⁵ Добры розум выклікае ласку, а на шляху несумленных — бездань.

¹⁶ Кожны разумны чалавек дзейнічае з розумам; а неразумны выяўляе бязглуздасць.

¹⁷ Бязбожны вяшчун трапляе ў бяду, а верны пасол — здароўе.

¹⁸ Беднасць і ганьба таму, хто пагарджае настаўленнем; а хто верыць таму, хто ганіць, — будзе ў пашане.

¹⁹ Жаданне, калі споўніцца, цешыць душу, а бязглуздыя адмаўляюцца бегчы ад ліха.

²⁰ Хто з мудрымі ходзіць — будзе мудрым, а сябар бязглуздых зробіцца ліхім.

²¹ За грэшнікамі гоніцца ліха, а дабром адплаціцца справядлівым.

²² Добры чалавек пакідае спадкаемцамі сыноў і ўнукаў, а маёмасць грэшніка зберагаецца для справядлівага.

²³ Многа хлеба бывае і на нівах бедных, а ёсць і той, хто гіне, бо не хапае законнасці.

²⁴ Ненавідзіць сына свайго той, хто шкадуе розгі, а хто любіць яго, той заўжды выхоўвае яго.

²⁵ Справядлівы насычае і напаўняе душу сваю, а чэрава бязбожнікаў — ненаеднае.