ВЫСЛОЎІ 12 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Хто любіць настаўленне — любіць веды; а хто ненавідзіць папрокі, той неразумны.

² Хто добры — знойдзе ласку ад Госпада; а чалавека хітрага Сам Ён асудзіць.

³ Не ўзмацніцца чалавек з бязбожнасці, а корань справядлівых не пахіснецца.

⁴ Дабрадзейная жонка — вянец для свайго мужа; і быццам гніенне ў касцях яго — тая, што несумленная.

⁵ Думкі справядлівых — разважлівасць; а парады бязбожнікаў — мана.

⁶ Словы бязбожнікаў учыняюць засаду дзеля забойства, а вусны справядлівых вызваляюць іх.

⁷ Знішчаюцца бязбожнікі — і ўжо няма іх, а дом справядлівых застанецца.

⁸ Пахваляць чалавека за яго веды; а той, хто дрэнны ў сэрцы, будзе занядбаны.

⁹ Лепей быць бедным, але працаваць на сябе, чым фанабэрыстым і не мець хлеба.

¹⁰ Справядлівы рупіцца аб жыцці жывёлы сваёй; а нутро бязбожнікаў — лютае.

¹¹ Хто сваю зямлю апрацоўвае — насыціцца хлебам, а хто ганяецца за прывідамі — неразумны.

¹² Бязбожнік жадае пасткі найгоршых, а корань справядлівых палепшыцца.

¹³ Ліхі чалавек трапляе ў пастку з-за грахоў сваіх вуснаў, а справядлівы пазбегне няшчасця.

¹⁴ З плода вуснаў сваіх кожны напоўніцца дабром, і паводле ўчынкаў рук яго адплоціцца яму.

¹⁵ Шлях бязглуздага — роўны ў вачах яго, а хто мудры — слухае парады.

¹⁶ Неразумны адразу выяўляе гнеў свой, а разумны ўтойвае гнеў.

¹⁷ Хто гаворыць праўду, той — вяшчун справядлівасці, а лжэсведка — маны.

¹⁸ Ёсць той, што гаворыць неабдумана, і ён, быццам мечам, ударае, а язык мудрых — здароўе.

¹⁹ Вусны праўды будуць трывалымі ў вечнасці, а язык хлуслівы — у моманце.

²⁰ Хітрасць у сэрцы тых, хто задумвае ліха; а хто абдумвае мірныя парады, за тымі следам ідзе радасць.

²¹ Ніякая загуба не здарыцца са справядлівымі, а бязбожнікі напоўняцца ліхам.

²² Агіднасць для Госпада — вусны лжывыя, а тыя, што робяць сумленна, — падабаюцца Яму.

²³ Разумны чалавек свае веды хавае, а сэрца неразумных падбухторвае да бязглуздасці.

²⁴ Рука моцных будзе ўладарыць, а тая, што апусцілася, будзе ў паслушэнстве.

²⁵ Сум у сэрцы чалавека будзе прыгнятаць яго, а развесяліць яго добрая размова.

²⁶ Справядлівы вядзе сябра да праўды, а шлях бязбожнікаў падмане іх.

²⁷ Не засмажыць лянота здабычу сваю, а ў чалавека руплівага будзе каштоўная маёмасць.

²⁸ На сцежцы справядлівасці — жыццё, але ёсць таксама шлях, што адкрыты для смерці.