ВЫСЛОЎІ 11 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Агіднасць для Госпада — вага падманная, а дакладная вага — воля Яго.

² Прыходзіць пыхлівасць — прыйдзе і ганьба; а ў пакорлівых — мудрасць.

³ Чыстасардэчнасць справядлівых будзе накіроўваць іх, а падкопы крывадушных загубяць іх.

⁴ У дзень гневу не дапаможа багацце, а справядлівасць выратуе ад смерці.

⁵ Справядлівасць чыстасардэчнага будзе кіраваць яго дарогай, а бязбожнік загіне ў сваёй бязбожнасці.

⁶ Справядлівасць справядлівых вызваліць іх, а несправядлівыя будуць захоплены ўласнымі падкопамі.

⁷ Калі памрэ бязбожнік, ніякай надзеі ў яго больш не будзе; а чаканне багацця загіне.

⁸ Справядлівы будзе вызвалены ад беднасці, а на месца яго трапіць бязбожнік.

⁹ Крывадушнік вуснамі падманвае сябра свайго, а справядлівыя будуць вызвалены ведамі.

¹⁰ У час росквіту справядлівых радуецца горад, а ў час пагібелі бязбожнікаў будзе пахвала.

¹¹ Дабраславеннем справядлівых узвысіцца горад, а вусны бязбожнікаў разбураць яго.

¹² Хто пагарджае сябрам сваім, той бедны на разважлівасць, а разважлівы чалавек будзе маўчаць.

¹³ Хто ходзіць перашэптваючыся, выяўляе таемнае, а верны душою ўтоіць справу.

¹⁴ Дзе няма парадку — народ загіне, а збаўленне там, дзе шматлікія парады.

¹⁵ Той будзе вынішчаны ліхам, хто за другога ручаецца; хто ненавідзіць паручыцеляў, той будзе агароджаны ад небяспекі.

¹⁶ Паслужлівая жанчына знойдзе славу, а дужыя набудуць багацце.

¹⁷ Міласэрны чыніць дабро душы сваёй, а бязлітасны мучыць самога сябе.

¹⁸ Бязбожнік робіць ілжывую справу, а для таго, хто сее справядлівасць, — пэўная ўзнагарода.

¹⁹ Надзейны чалавек рыхтуецца да справядлівасці, а прыхільнік ліха — да смерці.

²⁰ Агіда для Госпада — сэрца крывадушнае, а ласка Яго — да тых, хто ходзіць прама.

²¹ Вядома, ліхі чалавек не будзе беспакараны, а нашчадкі справядлівых збавяцца.

²² Залатое кольца ў лычы свінні — гэта прыгожая, але неразумная жанчына.

²³ Пажаданне справядлівых — толькі дабро, чаканне бязбожнікаў — абурэнне.

²⁴ Адны дзеляцца ўласным і становяцца багацейшымі, а другія, што занадта беражлівыя, заўсёды ў беднасці.

²⁵ Будзе насычана душа, якая дабраслаўляе; і хто напоіць другіх, той сам таксама будзе напоены.

²⁶ Хто хавае сваё збожжа, той праклінаецца ў народзе, а на галаву тых, якія прадаюць збожжа, — дабраславенне.

²⁷ Хто настойліва шукае дабра — шукае ласкі [Божай], а хто шукальнік ліха — да таго яно і прыйдзе.

²⁸ Хто спадзяецца на багацці свае, загіне, і, як зялёны ліст, будуць расці справядлівыя.

²⁹ Хто турбуе дом свой — атрымае вятры, а хто бязглузды — будзе слугою мудрага.

³⁰ Плод справядлівага — дрэва жыцця; і хто мудры — прыцягвае душы.

³¹ Калі справядліваму адплачваецца на зямлі, тым больш бязбожніку і грэшніку.