ВЫСЛОЎІ 10 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Прыпавесці Саламонавы. Мудры сын — радасць бацьку, а бязглузды сын — гора для маці сваёй.

² Ніяк не дапамогуць бязбожныя скарбы, а справядлівасць душу выратуе ад смерці.

³ Не пашкодзіць Госпад голадам справядліваму, а хцівасць бязбожнікаў знішчыць.

⁴ Лянівая рука ўтварае беднасць, а рука працавітых падрыхтоўвае багацце.

⁵ Той сын мудры, хто збірае ў жніво, а хто храпе ўлетку — сын шалапутны.

⁶ Дабраславенні Госпадавы — на галаве справядлівага, а вусны бязбожнікаў хаваюць лютасць.

⁷ Памяць справядлівага будзе ў дабраславенні, а імя бязбожнікаў сатлее.

⁸ Мудры сэрцам прымае пастановы, а бязглузды загіне праз вусны.

⁹ Хто ходзіць прама, той ходзіць вечна; а хто крывіць дарогі свае, будзе выкрыты.

¹⁰ Хто міргае вокам, той прынясе боль, а бязглузды вуснамі загубіць.

¹¹ Вусны справядлівага — крыніца жыцця, а вусны бязбожнікаў хаваюць лютасць.

¹² Нянавісць выклікае сваркі, а любоў пакрывае ўсе грахі.

¹³ У вуснах мудрага знаходзіцца мудрасць, а розгі — на спіне таго, хто не мае сэрца.

¹⁴ Мудрыя зберагаюць веды, а вусны бязглуздага — блізкія да пагібелі.

¹⁵ Маёмасць багатага — горад крэпасці яго; пагібель бедных — беднасць іх.

¹⁶ Праца справядлівага — на жыццё, а плады бязбожніка — на грэх.

¹⁷ Хто беражэ настаўленне — ідзе да жыцця, а хто адхіляе папрокі — блукае.

¹⁸ Ілжывыя вусны хаваюць нянавісць, а хто зневажае — той неразумны.

¹⁹ У шматслоўнасці не будзе недахопу ў грахах, а той, хто ўтрымлівае вусны свае, — самы разважлівы.

²⁰ Мова справядлівага — адборнае срэбра; сэрца ж бязбожнікаў — нічога не вартае.

²¹ Вусны справядлівага павучаюць вельмі многіх; а той, хто бязглузды, памрэ ад беднасці сэрца.

²² Дабраславенне Госпада робіць людзей багатымі; і не будзе дабаўлена ім ніякага цяжару.

²³ Быццам жартам бязглузды робіць злачынства, а мудрасць — для чалавека разважлівага.

²⁴ Чаго баіцца грэшнік, тое і прыйдзе да яго, а жаданне справядлівага здзейсніцца.

²⁵ Як праносіцца віхура — так знікне бязбожнік, а справядлівы — як вечны падмурак.

²⁶ Як укус для зубоў і дым для вачэй, так і гультай для тых, што яго паслалі.

²⁷ Страх Госпадаў дні памножыць, а гады бязбожнікаў скарацяцца.

²⁸ Чаканне справядлівых — радасць, а надзея бязбожнікаў загіне.

²⁹ Шлях Госпадаў — цвярдыня для чыстых сэрцам і пагібель для тых, хто робіць ліха.

³⁰ Справядлівы не пахіснецца да веку, а грэшнікі не выжывуць на зямлі.

³¹ Вусны справядлівага спараджаюць мудрасць, язык крывадушны будзе вырваны.

³² Вусны справядлівага бачаць прыемнае, а вусны бязбожнікаў — дрэннае.