ВЫСЛОЎІ 1 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Прыпавесці Саламона, сына Давідава, цара Ізраэльскага,

² каб спасцігнуць мудрасць і настаўленне, каб зразумець словы мудрасці;

³ каб атрымаць веды ў навучанні: справядлівасць, прыказанне і законнасць;

⁴ каб простым людзям прыдаць кемлівасці, юнаку — ведаў і развагі.

⁵ Мудры слухае і павялічвае веды, а разумны прыдбае ўмеласць:

⁶ зверне ўвагу на прытчу і алегорыю, словы мудрых і іх загадкі.

⁷ Шанаванне Госпада ёсць аснова ведаў. Мудрасці і навучання адцураюцца бязглуздыя.

⁸ Сыне мой, слухай перасцярогі бацькі свайго і не адхіляй запавету маці сваёй,

⁹ бо яны — вянок годнасці на галаве тваёй і каралі на шыі тваёй.

¹⁰ Сыне мой, калі цябе будуць прыцягваць грэшнікі, не прыставай да іх.

¹¹ Калі яны скажуць: «Пойдзем з намі! Наладзім засаду дзеля забойства, наставім прыхавана пасткі на бязвіннага;

¹² праглынём іх, як пекла: тых, што жывуць, і здаровых, як тых, што сыходзяць у магілу;

¹³ знойдзем усякую каштоўную маёмасць, запоўнім дамы свае здабыткамі;

¹⁴ далучы долю сваю да нашай, хай будзе адна кішэнь для ўсіх нас»;

¹⁵ сыне мой, не хадзі з імі, утрымай нагу сваю ад іх сцежак.

¹⁶ Бо ногі іх бягуць да злачынства і спяшаюцца, каб праліць кроў.

¹⁷ Дарэмна закідваецца сетка перад вачамі мноства птушак.

¹⁸ Яны наладжваюць засаду дзеля ўласнага забойства і задумваюць злачынствы супраць сваіх душ.

¹⁹ Такі шлях у кожнага, хто імкнецца да нарабаванага: захоплівае яно душу таго, хто валодае ім.

²⁰ Мудрасць гукае па плошчах, на вуліцах падымае голас свой,

²¹ на важнейшым месцы дарог шматлюдных крычыць, каля ўваходу ў гарадскую браму гучаць яе словы:

²² «Дакуль жа, невукі, будзеце любіць невуцтва, а насмешнікі — жадаць для сябе высмейвання, і недасведчаныя — ненавідзець навукі?

²³ Звярніцеся да майго выкрывання: вось, удыхну ў вас дух мой і выкажу вам словы мае.

²⁴ Бо вось, я клікала, а вы адмовіліся, працягнула руку сваю, але не было нікога, хто заўважыў бы яе.

²⁵ Вы пагрэбавалі ўсякаю маёю парадаю і адхілілі мае папрокі.

²⁶ Такім чынам, і я буду смяяцца з вашай пагібелі і кпіць буду, калі прыйдзе да вас трывога.

²⁷ Калі накінецца, як бура, страх, і пагібель узнікне, быццам віхура, калі апануе вас бяда і цесната.

²⁸ Тады прызываць будуць мяне, а не выслухаю, рупліва шукаць мяне будуць, а не знойдуць мяне.

²⁹ З-за таго, што настаўленне ненавідзелі і не выбралі страх Госпадаў,

³⁰ не згадзіліся з маёю парадаю і пагрэбавалі ўсім маім выкрываннем.

³¹ І вось, хай яны спажываюць плён свайго шляху, насычаюцца сваімі парадамі.

³² Адступніцтва невукаў заб’е іх, а нядбаласць бязглуздых загубіць іх.

³³ А той, хто слухае мяне, і прытулак ад страху знойдзе, і спакойны будзе, пазбавіўшыся страху перад ліхімі людзьмі».