БЫЦЦЁ 9 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ І дабраславіў Бог Ноя і сыноў яго, і сказаў ім: «Расціце, і размнажайцеся, і залюдняйце зямлю.

² Хай усе жывёлы, звяры зямныя і ўсе птушкі паднебныя з усімі тымі, што рухаюцца па зямлі, баяцца вас і дрыжаць перад вамі; усе рыбы марскія аддадзены ў рукі вашы.

³ Усё, што рухаецца і што жыве, будзе вам на ежу, як расліны зямныя, усё даю вам,

⁴ за выключэннем таго, што ёсць целам з душою, якая ў крыві, — не ежце.

⁵ Бо спытаю за кроў душ вашых з усіх жывёл; і з [кожнага] чалавека, і з [кожнага] брата яго спытаю за душу чалавека.

⁶ Хто праліе кроў чалавечую, чалавекам будзе пралітая і яго кроў; бо чалавек створаны на вобраз Божы.

⁷ А вы расціце і размнажайцеся, залюдняйце зямлю і валодайце ёю».

⁸ Вось што яшчэ сказаў Бог Ною і сынам яго разам з ім:

⁹ «Я, вось, усталёўваю запавет Мой з вамі і з нашчадкамі вашымі пасля вас

¹⁰ ды для кожнай жывой душы, якая разам з вамі: ці з ліку птушак, ці з ліку жывёл і ўсіх звяроў зямлі, якія з вамі, — для ўсіх, якія выйшлі з аркі, для ўсіх звяроў зямлі.

¹¹ Я ўсталёўваю запавет Мой з вамі так, што ўжо болей ніколі не будзе знішчана ніводнае цела водамі патопу ды ўжо ніколі не будзе патопу, што нішчыць зямлю».

¹² І сказаў Бог: «А гэта знак пагаднення, які Я даю паміж Мной і вамі і для кожнай душы жывой, якая з вамі, на вечныя пакаленні.

¹³ Вясёлку Маю пакладу на хмарах, і будзе яна знакам пагаднення паміж Мной і паміж зямлёю.

¹⁴ Калі пакрыю аблокамі неба, пакажацца вясёлка Мая на аблоках,

¹⁵ і прыгадаю Я пагадненне Маё з вамі і з кожнай душою жывой, з кожным чалавекам: і не будзе болей водаў патопу на пагібель усяго цялеснага.

¹⁶ І будзе вясёлка на аблоках, і ўбачу Я яе, і прыгадаю вечнае пагадненне, якое ёсць запаветам паміж Богам і кожнай жывой душою ўсякага цела, якое ёсць на зямлі».

¹⁷ І сказаў Бог Ною: «Гэта будзе знак пагаднення, якое Я заключыў між Мною і кожным целам на зямлі».

¹⁸ Сынамі ж Ноя, якія выйшлі з аркі, былі Сэм, Хам і Яфэт. І менавіта Хам быў бацькам Ханаана.

¹⁹ Гэтыя тры былі сынамі Ноя, і ад іх залюднілася ўся зямля.

²⁰ Ной, які быў земляробам, пачаў садзіць вінаграднік.

²¹ П’ючы віно, ён ап’янеў і ляжаў, аголены, у сваёй палатцы.

²² Хам, бацька Ханаана, убачыўшы галізну бацькі свайго, сказаў аб гэтым двум сваім братам, якія былі па-за палаткай.

²³ Тады Сэм і Яфэт усклалі плашч на плечы свае і, ідучы задам, прыкрылі сорам бацькі свайго; і твары іх былі звернуты назад, і яны не бачылі галізны бацькі свайго.

²⁴ Калі Ной, прачнуўшыся па ап’яненні ад віна, даведаўся, што яму зрабіў яго наймалодшы сын,

²⁵ то сказаў: «Пракляты Ханаан! Будзе ён паслугачом паслугачоў у братоў сваіх».

²⁶ І сказаў: «Дабраславёны Госпад, Бог Сэма! Хай Ханаан будзе яго паслугачом.

²⁷ Хай распаўсюдзіць Бог Яфэта. І хай ён пражывае ў палатках Сэма, і хай Ханаан будзе яго паслугачом».

²⁸ І жыў Ной па патопе трыста пяцьдзесят гадоў.

²⁹ І споўнілася ўсіх дзён яго дзевяцьсот пяцьдзесят гадоў, і ён памёр.