БЫЦЦЁ 5 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Вось запіс радаводу Адама. У дзень, калі Бог стварыў чалавека, зрабіў яго на падабенства Божае.

² Мужчынам і жанчынай стварыў іх, і дабраславіў іх, і даў ім імя «чалавек» тады, калі былі створаны.

³ Пражыў Адам сто трыццаць гадоў, і нарадзіўся ў яго сын, на вобраз і падабенства яго, і ён даў яму імя Сэт.

⁴ І было дзён Адама па нараджэнні Сэта восемсот гадоў, меў яшчэ сыноў і дачок.

⁵ І быў увесь прамежак часу, што пражыў Адам, дзевяцьсот трыццаць гадоў, і ён памёр.

⁶ Таксама Сэт пражыў сто пяць гадоў і меў сына Эноса.

⁷ Па нараджэнні Эноса пражыў Сэт восемсот сем гадоў і меў яшчэ сыноў і дачок.

⁸ І было ўсіх дзён Сэта дзевяцьсот дванаццаць гадоў, і ён памёр.

⁹ А Энос пражыў дзевяноста гадоў і меў сына Кенана.

¹⁰ І пражыў Энос па нараджэнні Кенана восемсот пятнаццаць гадоў, і меў сыноў і дачок.

¹¹ І было ўсіх дзён Эноса дзевяцьсот пяць гадоў, і ён памёр.

¹² Таксама Кенан пражыў семдзесят гадоў і меў сына Малаліэля.

¹³ І пражыў Кенан па нараджэнні Малаліэля восемсот сорак гадоў, і меў яшчэ сыноў і дачок.

¹⁴ І было ўсіх дзён Кенана дзевяцьсот дзесяць гадоў, і ён памёр.

¹⁵ Пражыў вось Малаліэль шэсцьдзесят пяць гадоў і меў сына Ярэда.

¹⁶ І пражыў Малаліэль па нараджэнні Ярэда восемсот трыццаць гадоў, і меў сыноў і дачок.

¹⁷ І было ўсіх дзён Малаліэля восемсот дзевяноста пяць гадоў, і ён памёр.

¹⁸ Пражыў Ярэд сто шэсцьдзесят два гады і меў сына Гэноха.

¹⁹ І жыў Ярэд па нараджэнні Гэноха восемсот гадоў, і меў сыноў і дачок.

²⁰ І было ўсіх дзён Ярэда дзевяцьсот шэсцьдзесят два гады, і ён памёр.

²¹ Гэнох жыў шэсцьдзесят пяць гадоў і меў сына Матусала.

²² І хадзіў Гэнох з Богам па нараджэнні Матусала трыста гадоў, і меў сыноў і дачок.

²³ І было ўсіх дзён Гэноха трыста шэсцьдзесят пяць гадоў.

²⁴ І хадзіў ён з Богам, і знік, бо забраў яго Бог.

²⁵ Таксама Матусал пражыў сто восемдзесят сем гадоў і меў сына Ламэха.

²⁶ І жыў Матусал па нараджэнні Ламэха семсот восемдзесят два гады і меў сыноў і дачок.

²⁷ І было ўсіх дзён Матусала дзевяцьсот шэсцьдзесят дзевяць гадоў, і ён памёр.

²⁸ Пражыў жа Ламэх сто восемдзесят два гады і меў сына,

²⁹ і даў яму імя Ной, кажучы: «Ён суцешыць нас у рабоце нашай і ў працы рук нашых на зямлі, якую Госпад пракляў».

³⁰ І жыў Ламэх па нараджэнні Ноя пяцьсот дзевяноста пяць гадоў, і меў яшчэ сыноў і дачок.

³¹ І было ўсіх дзён Ламэха семсот семдзесят сем гадоў, і ён памёр.

³² А калі Ной меў пяцьсот гадоў, нарадзіліся ў яго Сэм, Хам і Яфэт.