БЫЦЦЁ 25 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Абрагам узяў яшчэ іншую жонку на імя Кетура.

² Яна нарадзіла яму Замрана, і Ексана, і Мадана, і Мадыяна, і Ісбака, і Суэ.

³ А Ексан быў бацькам Сабы і Дэдана. Сынамі Дэдана былі Асурым, і Летусім, і Леўмім.

⁴ А з Мадыяна нарадзіліся Эфа, і Эфэр, і Гэнох, і Абіда, і Эльдаа. Усё гэта сыны Кетуры.

⁵ І аддаў Абрагам усё, што меў, Ізааку.

⁶ Сыноў жа наложніц сваіх шчодра абдарыў і аддзяліў іх ад Ізаака, сына свайго, яшчэ пры жыцці сваім, ва ўсходнім накірунку.

⁷ І было дзён жыцця Абрагама сто семдзесят пяць гадоў.

⁸ І, саслабеўшы, памёр Абрагам у добрай старасці і ў шаноўным узросце, і, насычаны жыццём, далучыўся ён да народа свайго.

⁹ І пахавалі яго Ізаак і Ізмаэль, сыны яго, у пячоры Махпэла, на полі Эфрона, сына Сэора Хетыта з мясцовасці Мамрэ,

¹⁰ якую Абрагам купіў у сыноў Хета. Там пахаваны сам ён і Сара, жонка яго.

¹¹ А па смерці яго дабраславіў Бог Ізаака, сына яго, які жыў каля студні Лахай-Рой.

¹² А вось нашчадкі Ізмаэля, сына Абрагама, якога нарадзіла яму егіпцянка Агар, паслугачка Сары.

¹³ Вось імёны сыноў Ізмаэля паводле іх імёнаў і радаводу: Набаёт, першародны сын Ізмаэля, далей Кедар, і Адбээль, і Мабсам,

¹⁴ таксама Масма, і Дума, і Маса,

¹⁵ Хадад і Тэма, Етур, і Нафіс, і Цэдма.

¹⁶ Вось сыны Ізмаэля, і такія імёны іх па мясцовасцях, у якіх яны прабывалі або пасяліліся, — дванаццаць князёў іх плямёнаў.

¹⁷ І споўнілася гадоў жыцця Ізмаэля сто трыццаць сем гадоў; саслабеўшы, памёр ён і далучыўся да народа свайго.

¹⁸ Яны ж пражывалі ад Хавілы аж да Сура, што насупраць Егіпта па дарозе ў Асірыю. І памёр ён у прысутнасці ўсіх братоў сваіх.

¹⁹ Гэта радавод Ізаака, сына Абрагама: Абрагам быў бацькам Ізаака.

²⁰ Ізаак, калі меў сорак гадоў, узяў сабе жонку Рэбэку, дачку Бэтуэля, арамейца з Падан-Арама, сястру Лабана арамейца.

²¹ І маліўся Ізаак за сваю жонку да Госпада, бо была яна няплоднай. І Госпад выслухаў яго, і дазволіў, каб Рэбэка, жонка Ізаака, пачала.

²² Калі немаўляты біліся ва ўлонні яе, яна падумала: «Калі так ёсць, то чаму ў мяне?» І пайшла папытацца Госпада.

²³ Ён прамовіў у адказ: «Два народы ў тваім улонні, і два народы раздзеляцца з нутра твайго: і адзін народ пераможа другі, і старэйшы будзе служыць малодшаму».

²⁴ Надышоў ужо час родаў, і вось: ва ўлонні яе двайняты.

²⁵ Той, які выйшаў першы, быў чырвоны і ўвесь, як плашч, валасаты; і далі яму імя Эзаў. Потым брат яго, выходзячы, трымаў Эзава за пятку, і таму далі яму імя Якуб.

²⁶ Ізаак меў шэсцьдзесят гадоў, калі дзеці нарадзіліся.

²⁷ А калі яны выраслі, Эзаў стаўся спрытным паляўнічым і чалавекам палёў; а Якуб быў чалавекам ціхім і пражываў у палатках.

²⁸ Ізаак любіў Эзава, таму што любіў ласавацца яго дзічынай, а Рэбэка любіла Якуба.

²⁹ Калі Якуб зварыў нейкую страву, падышоў з поля Эзаў надта змучаны

³⁰ і кажа: «Дай мне гэтай чырвонай стравы, бо я надта стомлены». Дзеля гэтай прычыны дадзена яму імя Эдом.

³¹ Якуб сказаў яму: «Прадай мне перш сваё першародства».

³² Ён адказаў: «Калі я ўміраю, што мне паможа першародства?»

³³ Якуб кажа: «Дык прысягні мне». І прысягнуў ён, і прадаў першародства.

³⁴ І так, атрымаўшы хлеб і страву з сачэвіцы, пад’еў ён і напіўся, і ўстаў і пайшоў, мала зважаючы, што прадаў першародства.