БЫЦЦЁ 10 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Вось гэтыя нашчадкі сыноў Ноя: Сэма, Хама і Яфэта. Па патопе нарадзіліся ім сыны.

² Сыны Яфэта: Гамэр, Магог, Мадай, Яван, Тубал, Масок і Тыр.

³ Сыны Гамэра: Аскеназ, і Рыфат, і Тагарма.

⁴ Сыны ж Явана: Эліса і Тарсіс, Кітым і Раданім.

⁵ Ад іх паходзяць жыхары ўзбярэжжаў і астравоў, падзеленыя паводле сваіх краёў і сваёй мовы, па плямёнах і паводле сваіх народаў.

⁶ А сыны Хама: Куш, і Міцраім, і Пут, і Ханаан.

⁷ Сыны Куша: Саба, і Хавіла, і Сабата, і Рэгма, і Сабатаха. Сыны Рэгмы: Саба і Дэдан.

⁸ Куш быў бацькам Німрода. Ён быў першым магутным на зямлі,

⁹ і ён быў дужы паляўнічы перад Госпадам. Адсюль пайшла прыказка: «Як Німрод, дужы паляўнічы перад Госпадам».

¹⁰ Пачаткам валадарання яго быў Бабілон, і Эрэх, і Акад, і Хальнэ у зямлі Сэнаар.

¹¹ З гэтай зямлі ён выйшаў у Асірыю і пабудаваў Нініву, Рэхабот-Ір і Калах,

¹² таксама Расэн, вялікі горад між Нінівай і Калахам.

¹³ А Міцраім быў бацькам Луда, і Анама, і Лааба, і Нафтуа,

¹⁴ і Патруса, і Каслуха, і Кафтора, ад якіх паходзяць філістынцы.

¹⁵ Ханаан жа меў сыноў: першароднага Сідона, Хета,

¹⁶ і Евусея, і Амарэя, Гергесея,

¹⁷ Гівея і Арацэя, Сінэя

¹⁸ і Арадзія, Самарэя і Эматэя; і пасля таго рассеяліся народы хананеяў.

¹⁹ І былі межы хананеяў, калі ісці ад Сідона ў напрамку Герара аж да Газы, пакуль не дойдзеш да Садома і Гаморы, і да Адамы і Себаіма, аж да Лесы.

²⁰ Гэта нашчадкі Хама паводле іх плямёнаў і моў, земляў і народаў.

²¹ Таксама ад Сэма, бацькі ўсіх сыноў Гебэра, старэйшага брата Яфэта, нарадзіліся [нашчадкі].

²² Сыны Сэма: Элам, і Асур, і Арпаксад, і Луд, і Арам.

²³ Сыны Арама: Уц, і Гул, і Гетэр, і Мэс.

²⁴ А Арпаксад быў бацькам Салы, ад якога нарадзіўся Гебэр.

²⁵ Нарадзіліся ж у Гебэра два сыны: першаму імя Пэлег, таму што ў днях яго раздзялілася зямля, а імя брата яго Ектан,

²⁶ Той Ектан быў бацькам Эльмадада, і Салефа, і Асармота, і Ярэ,

²⁷ і Адарама, і Узала, і Дэклы,

²⁸ і Абала, і Абімаэля, і Сабы,

²⁹ і Афіра, і Хавіла, і Ёбаба. Яны ўсе сыны Ектана.

³⁰ Месца іх пражывання было, калі ісці ад Мэшы аж да Сэфара, усходняй гары.

³¹ Яны сыны Сэма паводле плямёнаў, і моў, і земляў у народах сваіх.

³² Гэта вось плямёны сыноў Ноя паводле сваяцтва і народаў сваіх. Ад іх распаўсюдзіліся народы на зямлі па патопе.