ІСУСА 21 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ І прыйшлі кіраўнікі родаў Левіевых да Элеязэра святара, і да Ешуа, сына Нуна, і да кіраўнікоў родаў кожнага з пакаленняў сыноў Ізраэля, і паведамілі ім

² у Сіло зямлі Ханаан, і сказалі: «Праз Майсея Госпад загадаў, каб дадзены былі нам гарады на пражыванне і наваколлі іх для выпасу жывёлы».

³ І сыны Ізраэля далі левітам са сваёй уласнасці, па загадзе Госпада, гарады тыя з іх наваколлямі.

⁴ І выпала жэрабя для родаў Кагата: і атрымалі сыны Аарона святара, ад пакалення Юды, і Сімяона, і Бэньяміна трынаццаць гарадоў.

⁵ І астатнія сыны Кагата атрымалі ад пакаленняў Эфраіма, і Дана, і паловы пакалення Манасы дзесяць гарадоў.

⁶ Далей сынам Гэрсона выпала жэрабем, каб атрымаць трынаццаць гарадоў ад пакаленняў Ісахара, і Асэра, і Нэфталі, і паловы пакалення Манасы ў Басане.

⁷ І сынам Мэрары па родах іх жэрабем выпала дванаццаць гарадоў ад пакаленняў Рубэна, і Гада, і Забулона.

⁸ І сыны Ізраэля аддалі левітам гэтыя гарады разам з іх наваколлямі, як загадаў Госпад праз Майсея, даючы кожнаму па жэрабі.

⁹ Ад пакаленняў сыноў Юды і Сімяона

¹⁰ сынам Аарона з роду Кагата, левіцкага паходжання, — бо на іх выпала першае жэрабя, — аддалі гарады, назвы якіх наступныя:

¹¹ Карыят-Арба, бацькі Анака, які інакш называецца Геброн, на гары Юды, разам з наваколлямі яго.

¹² Палі, аднак, і вёскі яго аддалі ва ўласнасць Калебу, сыну Ефоны.

¹³ Такім чынам, сынам святара Аарона ў Геброне далі горад для ўцёкаў і наваколлі яго, і Лебну разам з яе наваколлямі,

¹⁴ і Ятэр, і Эстэмо,

¹⁵ і Хелон, і Дабір,

¹⁶ і Аін, і Юту, і Бэтсамэс з іх наваколлямі: дзевяць гарадоў ад двух гэтых пакаленняў.

¹⁷ А ад пакалення Бэньяміна Габаон, і Габу,

¹⁸ і Анатот, і Алмат з іх наваколлямі: чатыры гарады.

¹⁹ Усіх разам гарадоў для сыноў Аарона святара трынаццаць разам з іх наваколлямі.

²⁰ А астатнім з родаў сыноў Кагата, левітам, была дадзена наступная ўласнасць:

²¹ ад пакалення Эфраіма — горад для ўцёкаў Сіхэм з наваколлямі яго на гары Эфраім, і Газэр,

²² і Кібцаім, і Бэтарон з іх наваколлямі: чатыры гарады.

²³ Таксама ад пакалення Дана — Эльтэк, і Габэтон,

²⁴ і Аялон, і Гет-Рэмон з іх наваколлямі: чатыры гарады.

²⁵ А ад паловы пакалення Манасы — Танах і Гет-Рэмон з іх наваколлямі: два гарады.

²⁶ Усіх гарадоў з іх наваколлямі дадзена было дзесяць астатнім сынам Кагата.

²⁷ Таксама сынам Гэрсона з роду Леві далі ад паловы пакалення Манасы горад для ўцёкаў Галан у Басане і Атарот з наваколлямі іх: два гарады.

²⁸ Далей ад пакалення Ісахара — Кэслон, Дабэрэт,

²⁹ і Ярмут, і Эн-Ганім з наваколлямі іх: чатыры гарады.

³⁰ А ад пакалення Асэра — Масал, і Абдон,

³¹ і Хэлькат, і Рагоб з наваколлямі іх: чатыры гарады.

³² Таксама ад пакалення Нэфталі — горад для ўцёкаў Кадэс у Галілеі, і Аматдор, і Картан з наваколлямі іх: тры гарады.

³³ Усіх гарадоў родаў Гэрсона — трынаццаць разам з іх наваколлямі.

³⁴ А сынам Мэрары, астатнім левітам, далі па родах іх ад пакалення Забулона: Екнаам, і Карту,

³⁵ і Рэмон, і Наалол з іх наваколлямі: чатыры гарады.

³⁶ Ад пакалення Рубэна за Ярданам насупраць Ерыхона горад для ўцёкаў Басор у пустыні, і Ясу,

³⁷ і Кадэмот, і Мэфаат: чатыры гарады з іх наваколлямі.

³⁸ І ад пакалення Гада — горад для ўцёкаў Рамот у Галаадзе, і Маханаім,

³⁹ і Хесебон, і Язэр: чатыры гарады з іх наваколлямі.

⁴⁰ Усіх гарадоў сыноў Мэрары астатніх па родах ад родаў левітаў — дванаццаць.

⁴¹ Дык усіх гарадоў сыноў Леві паміж уладання сыноў Ізраэля было сорак восем разам з іх наваколлямі,

⁴² кожны горад са сваімі наваколлямі кругом.

⁴³ І даў Госпад Ізраэлю ўсю зямлю, якую прысягнуў даць бацькам іх, і яны атрымалі яе ва ўладанне і абжыліся на ёй.

⁴⁴ І даў ім Госпад супакой з усіх бакоў, і ніхто з ворагаў не адважыўся ваяваць з імі, але ўсіх ворагаў Госпад падпарадкаваў Ізраэлю.

⁴⁵ І ні адно слова добрае, якое сказаў Ён дому Ізраэля, не было пустым, але ўсё споўнілася.