ІСУСА 19 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ І другое жэрабя выпала сынам Сімяона па родах іх;

² і ўласнасць іх знаходзілася сярод уласнасці сыноў Юды. Бээр-Сэба, або Сама, і Малада,

³ і Асарсуал, і Бала, і Эсэм,

⁴ і Эльталад, і Бэтул, і Хорма,

⁵ і Сікэлаг, і Бэтмархабот, і Асарсуса,

⁶ і Бэтлебаот, і Сараген: трынаццаць гарадоў з іх навакольнымі вёскамі.

⁷ Аін, і Рэмон, і Этэр, і Асан: чатыры гарады з іх навакольнымі вёскамі.

⁸ Усе вёскі вакол гэтых гарадоў аж да Баалат-Бээра, значыць Рамот-Нагэба: гэта ўласнасць сыноў Сімяона па родах іх.

⁹ Частка для сыноў Сімяона ўзятая была з уласнасці сыноў Юды, якая была даволі вялікай; і таму сыны Сімяона атрымалі ўласнасць між іх.

¹⁰ І трэцяе жэрабя выпала сынам Забулона па родах іх; мяжа іх уладання была аж да Сарыда,

¹¹ і ішла на захад да Мэралы, і даходзіла да Дэбасэта аж да ручая, які насупраць Екнаама,

¹² ад Сарыда паварочвала на ўсход у напрамку Кэсэлет-Табора, і ішла да Дабэрэта і падымалася да Яфіі.

¹³ І адтуль мяжа пераходзіла на ўсход, да Гет-Хефэра, да Этакасіна, і выходзіла да Рэмона, і ўхілялася да Ноа,

¹⁴ і ішла на поўнач каля Ханатона. І былі ў яе выхады да даліны Эфтагэл;

¹⁵ і Катэт, і Наалол, і Сэмрон, і Едала, і Бэтлехэм: дванаццаць гарадоў разам з іх вёскамі.

¹⁶ Такая ўласнасць пакалення сыноў Забулона па родах іх, гарады з іх навакольнымі вёскамі.

¹⁷ Чацвёртае жэрабя выпала на пакаленне Ісахара па родах яго.

¹⁸ І ўласнасцю яго былі Езрагэль, і Хасалот, і Сунам,

¹⁹ і Хафараім, і Сэон, і Анахарат,

²⁰ і Рабіт, і Кэслон, і Абэс,

²¹ і Рамэт, і Эн-Ганім, Эн-Гадзі, і Бэтпэсас.

²² І дасягала мяжа яго аж да Табора, і Сэгасімы, і Бэтсамэса, і былі ў яе выхады да Ярдана; шаснаццаць гарадоў з іх навакольнымі вёскамі.

²³ Такая ўласнасць сыноў Ісахара па родах іх, гарады і іх навакольныя вёскі.

²⁴ І пятае жэрабя выпала пакаленню сыноў Асэра па родах іх.

²⁵ І мяжой іх былі: Хэлькат, і Халі, і Бэтэн, і Ахсаф,

²⁶ і Эльмэлех, і Амаад, і Масал, і даходзіла мяжа аж да Кармэля на захадзе і аж да Сігор-Лабаната;

²⁷ і паварочвала на ўсход да Бэтдагона, і дасягала Забулона і даліны Эфтагэл на поўначы, і ішла далей праз Бэтэмэк і Наэль. І выходзіла да левага боку Кабула,

²⁸ і да Абрана, і Рагоба, і Хамона, і Кана аж да вялікага Сідона;

²⁹ і заварочвала да Рамы аж да вельмі ўмацаванага горада Тыра, і вярталася да Госы; і былі ў яе выхады ў мора; Махалеб і Ахзіб,

³⁰ і Ама, і Афэк, і Рагоб: дваццаць два гарады з іх навакольнымі вёскамі.

³¹ Гэта ўласнасць пакалення сыноў Асэра па родах іх; гарады і сёлы іх.

³² Шостае жэрабя выпала сынам Нэфталі па родах іх.

³³ І мяжа іх ішла з Гэлефа і ад дуба ў Саананіме і да Адамі-Нагэба і Ібнээля, аж да Лекума, і выхады ў яе былі аж да Ярдана;

³⁴ і на захадзе мяжа ішла да Азнот-Табора, і адтуль выходзіла на Хукок і датыкалася Забулона на поўдні, і Асэра на захадзе, і Ярдана — на ўсходзе сонца;

³⁵ гарадамі самымі ўмацаванымі былі: Асэдым, Сэр і Амат, Рэкат і Кінэрэт,

³⁶ і Адама, і Рама, і Асор,

³⁷ і Кадэс, і Эдраі, і Эн-Асор,

³⁸ Ярон і Магдалэль, Харэм, і Бэтанат, і Бэтсамэс: дзевятнаццаць гарадоў з іх навакольнымі вёскамі.

³⁹ Такая ўласнасць пакалення сыноў Нэфталі па родах іх; гарады з іх навакольнымі вёскамі.

⁴⁰ Сёмае жэрабя выпала сынам Дана па родах іх.

⁴¹ І мяжою яго ўласнасці былі: Цора, і Эстаол, Гір-Самэс.

⁴² і Сэлебін, і Аялон, Ятэла,

⁴³ і Элон, і Тамна, і Акарон,

⁴⁴ і Эльтэк, і Габэтон, і Баалат,

⁴⁵ і Юда, і Бэнэбарах, і Гет-Рэмон,

⁴⁶ і Мэяркон, і Арэкон з мяжою, што глядзіць на Ёпэ.

⁴⁷ І мяжа сыноў Дана ўцякае ад іх. І выправіліся сыны Дана, і ўступілі ў бой з Ласэмам, і занялі яго; і забілі яго вастрыём меча, і апанавалі яго, і абжыліся там, і назвалі яго Ласэм-Дан, ад імя Дана, бацькі свайго.

⁴⁸ Такое ўладанне пакалення сыноў Дана па родах іх, гарады і сёлы іх.

⁴⁹ І калі сыны Ізраэля скончылі падзел зямлі жэрабем для кожнага з пакаленняў сваіх, тады сыны Ізраэля далі ўласнасць Ешуа, сыну Нуна, пасярод сябе;

⁵⁰ па загадзе Госпада далі яму горад, які ён запатрабаваў для сябе: Тамнатсар на гары Эфраім. І ён адбудаваў гэты горад і абжыўся ў ім.

⁵¹ Гэта ўладанні, якія падзялілі жэрабем Элеязэр святар, і Ешуа, сын Нуна, і князі пакаленняў сыноў Ізраэля ў Сіло ў прысутнасці Госпада пры ўваходзе ў палатку сустрэчы; і быў скончаны падзел зямлі.