ІСАІ 32 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ І, вось жа, валадар будзе валадарыць па законе, а князі кіраваць будуць па законе.

² І будзе чалавек, як сховішча ад ветру ды прыпынак перад бурай, як ручаі водаў на засохлай зямлі або засень вялікай скалы на сухой зямлі.

³ Вочы тых, хто глядзяць, не будуць прыслеплены, а вушы тых, хто слухаюць, будуць пільна прыслухоўвацца.

⁴ І сэрца неразумных спасцігне мудрасць, а язык шапялявых скора будзе гаварыць і выразна.

⁵ Не будзе больш той, хто безразважны, называцца высакародным, ані ашуканец не будзе званы вяльможным.

⁶ Бо неразумны гаворыць недарэчнасці, сэрца ж яго плануе ліхоту, каб дапусціцца бязбожнасці ды гаварыць блюзнерствы супраць Бога, ды каб душу таго, хто прагне, пакінуць пустой і адабраць пітво ў сасмаглага.

⁷ У ашуканца ашуканствы — найгоршыя: ён бо перадумвае спосабы, каб загубіць пакорлівых словамі хлусні, хоць нават калі бедны дакажа справядлівасць.

⁸ Высакародны ж дасць парады высакародныя, ды сам да высакародных рэчаў імкнецца.

⁹ Жанчыны пустыя, устаньце, паслухайце голасу Майго. Даверлівыя дочкі, вазьміце ў вушы слова Маё!

¹⁰ За год і некалькі дзён задрыжыце, здавераныя ў сабе! Скончыўся ўжо збор віна, другі збор не прыйдзе.

¹¹ Аслупянейце, пустыя; бойцеся, здавераныя ў сабе! Распраніцеся і станьце голымі, аперазайце клубы вашы.

¹² Біце сябе ў грудзі дзеля пажаданай краіны, дзеля пладаноснага вінаградніку.

¹³ На зямлі народа Майго ўзыходзяць церні і калючкі, над усімі дамамі радасці, над вясёлым горадам:

¹⁴ дом бо пакінуты, мнагалюдны горад абязлюдзеў; Афэл і Баган сталіся пячорамі навек: радасцю для дзікіх аслоў, выганам для статкаў,

¹⁵ аж пакуль не будзе выліты на нас Дух з вышыні. І пустыня станецца садам, а сад за лес будзе лічыцца.

¹⁶ Тады на пустыні зажыве законнасць, а справядлівасць асядзе ў садзе.

¹⁷ Вынікам справядлівасці будзе супакой, а плодам закону — цішыня, ды бяспека — у спакон вякоў.

¹⁸ Ды жыць будзе народ Мой жыццём спакойным, і ў палатках надзейнасці, і ў месцах бяспекі.

¹⁹ І лес увесь паваліцца, а горад будзе моцна прыгнечаны.

²⁰ Шчасныя, што сееце над усімі водамі, прыводзячы [туды] вала і асла.