ІСАІ 2 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Слова, якое было ў бачанні Ісаі, сына Амоса, пра Юду і Ерузалім.

² І будзе ў апошнія дні падрыхтавана гара Госпадава на вяршыні гор, і ўздымецца яна над узгоркамі, і будуць сцякацца да яе ўсе народы.

³ І пойдзе шмат людзей, і скажуць яны: «Ідзіце, і ўзыдзем на гару Госпадаву і ў дом Бога Якубава, і хай навучыць Ён нас дарогам Сваім, і будзем хадзіць па сцежках Яго; бо з Сіёна выйдзе закон і слова Госпадава з Ерузаліма».

⁴ І будзе Ён судзіць народы і выкрые мноства людзей, і перакуюць яны мечы свае на плугі, а дзіды свае — на сярпы. Не падыме народ на народ меча, і не будуць больш рыхтавацца да бою.

⁵ Доме Якуба, прыходзьце ды будзем хадзіць у святле Госпадавым.

⁶ Сапраўды, адкінуў Ты народ Твой, дом Якуба, бо багата стала сярод іх чараўнікоў усходніх, і варажбіты ў іх былі, як у філістынцаў, і падаюць яны рукі чужынцам.

⁷ Край яго багаты срэбрам і золатам, ды бязмежныя яго скарбы,

⁸ і багатая зямля яго конямі, ды незлічоныя яго павозкі, і багатая зямля яго ідаламі: пакланяюцца яны творам рук сваіх, што зрабілі пальцы іх.

⁹ І сагнуўся чалавек, і прынізіўся род людскі; не даруй ім!

¹⁰ Увайдзі ў скалу, схавайся ў пыле перад страхам ад аблічча Госпада і славы магутнасці Яго.

¹¹ Высока ўзнятыя вочы чалавека апусцяцца, і сагнецца пыха людская; адзін толькі Госпад узвысіцца ў той дзень.

¹² Дзень бо Госпада Магуццяў надыдзе на кожнага пыхлівага і надутага, і на кожнага, хто выхваляецца, і будзе ён упакораны,

¹³ і на ўсе кедры Лібана, гонкія і высокія, і на ўсе дубы Басана,

¹⁴ і на ўсе горы высокія, і на ўсе ўзгоркі паднятыя,

¹⁵ і на кожную вежу ўзнесеную, і на кожны мур умацаваны,

¹⁶ і на ўсе караблі Тарсіса, і на ўсе судны прыгожыя.

¹⁷ Ды прыгнецца велічнасць чалавечая і прынізіцца пыха людская, і адзін толькі Госпад узвысіцца ў той дзень,

¹⁸ і ідалы дашчэнту будуць стру-шчаны.

¹⁹ Тады ўвойдуць яны ў шчыліны скал і ў пячоры каменныя перад абліччам страху Госпадава і перад славай велічнасці Яго, калі паўстане Ён, каб страсянуць зямлю.

²⁰ У той дзень выкіне чалавек кратам і кажанам ідалаў сваіх срэбраных і балванаў сваіх залатых, якіх зрабіў ён сабе, каб пакланяцца.

²¹ І ўвойдзе ён у шчыліны скалаў і ў пячоры каменныя перад абліччам страху Госпадава і перад славай велічнасці Яго, калі паўстане Ён, каб страсянуць зямлю.

²² Дык не чапайце чалавека, дух якога ў ноздрах яго. Чаго ён будзе варты?