ЁВА 5 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Дык крычы, калі ёсць той, хто табе адкажа! Да каго са святых звернешся ты?

² Бо бязглуздага забівае гняўлівасць, а неразумнага губіць зайздрасць.

³ Я бачыў бязглуздага, трывала ўкаранёнага, і пракляў я дом яго ў той жа час.

⁴ Далёка будуць сыны яго ад збаўлення, і будуць іх штурхаць у браме, і не будзе таго, хто б выбавіў.

⁵ Ураджай яго з’есць галодны, а самога яго ўзброены схопіць, і прагныя вып’юць багацце яго.

⁶ Бо не з пылу бярэцца няшчасце, і не з зямлі вырастае пакута,

⁷ але чалавек спараджае працу, як птушкі ўзнімаюцца ў палёт.

⁸ З гэтай прычыны я буду прасіць Госпада і ўзнясу прамову сваю да Бога,

⁹ Які чыніць вялікае, і недаследнае, і дзівоснае без ліку;

¹⁰ Які дае дождж на аблічча зямлі і абмывае водамі палеткі;

¹¹ Які пакорлівых ставіць высока, а тужлівых падтрымлівае выратаваннем;

¹² Які разбівае намеры ліхадзеяў, каб не змаглі рукі іх выканаць тое, што пачалі;

¹³ Які ловіць мудрых у хітрасці іх і змову нягоднікаў разбівае.

¹⁴ Днём яны забягуць у цемру і, быццам уночы, будуць навобмацак ісці апоўдні.

¹⁵ Затое Ён выратуе няшчаснага ад меча вуснаў іх і ад рукі пераследніка — беднага;

¹⁶ і будзе спадзяванне няшчаснаму, несправядлівасць жа закрые рот свой.

¹⁷ Шчасны чалавек, якога дакарае Бог; дык ушчуваннем Усемагутнага не пагарджай.

¹⁸ Бо Ён раніць і лечыць, Ён б’е, і рукі Яго аздараўляюць.

¹⁹ Ад шасці бед збавіць цябе, і ў сёмы раз не кране цябе няшчасце.

²⁰ У голад Ён выбавіць цябе ад смерці, а ў час вайны — ад рукі меча.

²¹ Усцеражэшся ты ад бізуна языка і не збаішся спусташэння, калі яно прыйдзе.

²² У час спусташэння і голаду будзеш ты смяяцца ды не будзеш баяцца звяроў зямных.

²³ Але з камянямі палявымі дамова твая і звяры зямныя будуць да цябе прыязныя.

²⁴ І ты даведаешся, што палатка твая ў супакоі, і, наведваючы жытло сваё, не дапусціш памылкі.

²⁵ І даведаешся таксама, што насенне тваё будзе шматлікае і нашчадкі твае — быццам зелле зямное.

²⁶ І ўвойдзеш у магілу ў гадах саспелых, як ставіцца сноп пшаніцы ў час свой.

²⁷ Вось, як мы даследавалі гэта, так і ёсць; паслухай гэта і сам зразумей для сябе».