ЁВА 40 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ І адказваючы, Госпад з віхуры сказаў Ёву:

² «Як мужчына, падпаяшы сцёгны свае. Я буду ў цябе пытацца, а ты тлумач Мне.

³ Ці хочаш ты абвергнуць суд Мой і асудзіш Мяне, каб сябе апраўдаць?

⁴ І ці ты маеш плячо, як Бог, і калі ты падобным голасам грыміш, як Ён,

⁵ атачы сябе прыгажосцю і веліччу і адзенься ў славу і прыгажосць.

⁶ Пралі абурэнне гневу Свайго і, паглядзеўшы на кожнага ганарлівага, упакор [яго].

⁷ Глянь на ўсіх пыхліўцаў, і асаром іх, і выгубі бязбожных на іх месцах.

⁸ Схавай іх разам у пыле і твары іх закрый цемраю.

⁹ Тады Я прызнаю, што правая рука твая можа збавіць цябе.

¹⁰ Вось бегемот, якога Я стварыў разам з табою; і есць ён сена, як вол.

¹¹ Сіла яго ў сцёгнах яго, а дужасць яго ў пупку жывата яго.

¹² Круціць хвастом сваім, як кедрам, жылы сцёгнаў яго моцна сплецены.

¹³ Косці яго — як медныя трубы, і храшчы яго — як пруты жалезныя.

¹⁴ Ён ёсць пачаткам шляхоў Божых. Той, Хто стварыў яго, можа паднесці да яго меч.

¹⁵ Горы прыносяць яму ежу, усе звяры дзікія там гуляюць.

¹⁶ Ён спіць у рошчах лотасу, у сховах трыснягу і ў балоцістых мясцінах.

¹⁷ Рошчы лотасаў распасціраюць над ім цень, атачаюць яго вербы пры ручаю.

¹⁸ Калі рака ўздымаецца, ён не баіцца; ён бяспечны, нават калі вада даходзіць да пашчы.

¹⁹ Хто можа захапіць яго на вачах яго ці пракалоць яму ноздры калом?

²⁰ Ці зможаш ты Левіятана выцягнуць кручком і вяроўкаю ці схопіш яго за язык?

²¹ Ці ўкладзеш ты трысціну ў яго ноздры або ці праколеш сківіцу яго цярнінаю?

²² Ці будзе ён дужа прасіць цябе або гаварыць да цябе ласкава?

²³ Ці заключыць ён з табою запавет і ты возьмеш яго на вечную службу?

²⁴ Ці пагуляеш ты з ім, як з птушкаю, або прывяжаш яго для сваіх дачок?

²⁵ Ці загледзяцца на яго сябры, ці падзеляць яго купцы?

²⁶ Ці праб’еш ты скуру яго стрэламі, а галаву яго — рыбацкай астрогаю?

²⁷ Пакладзі на яго сваю руку, і памятай пра бітву: і больш не будзеш.