ЁВА 38 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Тады Госпад з віхуры сказаў Ёву ў адказ:

² «Хто гэта, што неразумнымі словамі зацямняе задуму?

³ Перапаяшы, як мужчына, сцёгны свае, і Я буду пытацца ў цябе, і ты тлумач Мне.

⁴ Дзе ты быў, калі Я закладваў падмурак зямлі? Адкажы Мне, калі маеш розум.

⁵ Хто даў меру ёй, ці ты ведаеш? Або хто працягнуў над ёй вяроўку мерную?

⁶ На чым замацавана апірышча яе? Або хто залажыў кутні камень яе,

⁷ калі гаманілі разам зоркі раннія і калі радасна цешыліся ўсе сыны Божыя?

⁸ Хто зачыніў мора брамамі, калі вырывалася яно, нібы з улоння выходзячы,

⁹ калі апранаў у хмары яго і ў імглу яго, як у пялёнкі, спавіваў?

¹⁰ Я акрэсліў яго сваімі межамі і паставіў загарадку і брамы,

¹¹ і сказаў: “Дасюль дойдзеш, а далей не пяройдзеш, і тут разаб’еш узбураныя хвалі твае”.

¹² Ці загадваў ты па днях сваіх світанню і ці вызначаў зараніцы месца яе,

¹³ і, калі б ты трымаў за канцы зямлю, ці выкалачаны былі б бязбожнікі з яе?

¹⁴ Той, хто пад пячаткай, зменіцца, як гліна, і стане, як адзенне каляровае.

¹⁵ Будзе забранае ў бязбожных святло іх, і зламаецца рука ўзнесеная.

¹⁶ Ці даходзіў ты да крыніц мора, і ці хадзіў па дне бяздоння?

¹⁷ Ці адкрытыя былі табе брамы смерці, і ці бачыў ты дзверы цемры?

¹⁸ Ці аглядаў ты абшары зямлі? Раскажы Мне, калі ведаеш усё.

¹⁹ Пры якой дарозе святло жыве, і дзе месца цемрадзі,

²⁰ каб давёў ты кожнае паасобку да межаў сваіх і зразумеў шляхі дому яго?

²¹ Ты ведаеш, бо тады ты быў ужо народжаны, і лічба дзён тваіх вельмі вялікая!

²² Ці даходзіў ты да сховішча снегу і ці бачыў ты сховішчы граду,

²³ якія падрыхтаваў Я на час гора і на дзень бою і вайны.

²⁴ Па якім шляху разліваецца святло, разыходзіцца палючы вецер па зямлі?

²⁵ Хто вызначыў накірунак самай гвалтоўнай навальніцы і шлях для грымотнай маланкі,

²⁶ каб ліў дождж на зямлю бязлюдную, у пустыні, дзе няма ніводнага са смяротных,

²⁷ каб насыціць бездарожжа і пустэчу і каб вырасціць траву на засохлай зямлі?

²⁸ Хто ёсць бацька дажджу? Або хто нарадзіў кроплі расы?

²⁹ З чыйго нутра нарадзіўся лёд, і хто нарадзіў іней на небе?

³⁰ Як камень, вада цвярдзее, і паверхня бяздоння сціскаецца.

³¹ Ці здолееш злучыць шэраг зорак Пляядаў або ці зможаш развязаць пояс Арктура?

³² Ці выведзеш Паўночную Карону ў свой час, і Мядзведзіцу з сынамі ты павядзеш?

³³ Ці ведаеш ты законы неба і ці можаш напісаць іх на зямлі?

³⁴ Ці ўздымеш свой голас да хмар, і каб хвалі вады накрылі цябе?

³⁵ Ці пашлеш ты бліскавіцы, і ці пойдуць яны і скажуць табе: “Мы тут”?

³⁶ Хто ўклаў у нутро ібіса мудрасць, і хто пеўню даў розум?

³⁷ Хто з мудрасцю размяркуе хмары, і хто зрушыць бурдзюкі нябесныя,

³⁸ калі пыл становіцца цвёрдай зямлёй, а глеба зліпаецца?

³⁹ Ці львіцы ты наловіш здабычы і душы львянят яе задаволіш,

⁴⁰ калі яны вылежваюцца ў логавах або ў гушчары пільнуюць у засадзе?

⁴¹ Хто гатуе крумкачу страву яго, калі дзеці яго, туляючыся, клічуць да Бога, бо не маюць ежы?