ЁВА 36 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ І ў дадатак Элію вось што сказаў:

² «Пачакай мяне хвілінку, і я пакажу табе: бо я маю яшчэ нешта сказаць пра Бога.

³ Паўтару навуку маю здалёк і Творцу майму аддам справядлівасць.

⁴ Бо праўдзівыя і без падману словы мае, і перад табой [я] дасканалы ў веданні.

⁵ Не дасць Бог магутны і не адкідае Магутны моцаю сэрца,

⁶ не дасць Ён жыць бязбожніку, але чыніць суд для бедных.

⁷ Не адверне Ён ад справядлівага вачэй сваіх і цароў на пасадзе размяшчае на векі, і яны ўзвышаюцца.

⁸ І, калі яны будуць закаваныя ў кайданы і звязаныя путамі бядоты,

⁹ Ён пакажа ім справы іх і злачынствы іх, што яны былі гвалтоўныя.

¹⁰ І адкрые Ён вуха іх, каб навучыць іх з дакорам, і будзе гаварыць ім, каб адвярнуліся ад злачыннасці.

¹¹ Калі паслухаюцца і будуць шанаваць Яго, то пражывуць свае дні ў дабрабыце і свае гады ў шчасці.

¹² А калі не паслухаюцца, то пройдуць праз раку смерці і загінуць у безразважнасці.

¹³ А бязбожнікі складаць будуць гнеў Божы ў сваім сэрцы і не прызавуць Яго, калі будуць скаваныя.

¹⁴ Памрэ ў маладосці дух іх, і жыццё іх — у юнацтве.

¹⁵ Ён уратуе беднага ад нястачы яго і адкрые вуха ў бядзе яго.

¹⁶ Дык выбавіць Ён цябе з уціску, і будзе прастора, а не цяснота перад табою, і будзе поўнае тлушчу ўсё на стале тваім.

¹⁷ Справа твая асуджана, быццам бязбожніка; яны атрымаюць суд і справядлівасць.

¹⁸ Сцеражыся, каб не звяло цябе багацце і мноства дароў не скрывіла цябе.

¹⁹ Ці будзеш ты крычаць і выкарыстоўваць усе намаганні сілы тваёй, пакуль ты не ў цясноце?

²⁰ Не чакай прагна той ночы, каб узняўся натоўп дзеля іх.

²¹ Сцеражыся, каб не звярнуўся да злачынства, бо праз яго спазнаеш ты гора.

²² Вось жа, Бог высокі ў моцы Сваёй, які настаўнік падобны да Яго?

²³ Хто зможа прасачыць дарогі Яго, або хто можа Яму сказаць: “Ты ўчыніў несправядлівасць”?

²⁴ Памятай, каб услаўляць справу Яго, пра якую спяваюць мужы.

²⁵ Усе людзі бачаць Яго, кожны прыглядаецца здалёк.

²⁶ Вось жа, Бог вялікі і пераўзыходзіць веданне наша; лік гадоў Яго невызначальны.

²⁷ Ён збірае кроплі дажджу і вылівае ліўні ракою,

²⁸ іх праліваюць хмары, скропліваючы многіх людзей.

²⁹ Хто, сапраўды, можа зразумець разлегласць хмар, грымоты палаткі Яго?

³⁰ Вось, Ён расцягнуў вакол Сябе маланкі Свае і накрыў глыбіні мора.

³¹ Праз іх Ён судзіць народы і шчодра корміць іх.

³² У руках сваіх Ён трымае маланку і загадвае ёй, каб біла.

³³ Грукат яе паведамляе аб ёй, палаючы гневам супраць злачыннасці.