ЁВА 35 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Тады Элію вось што сказаў:

² «Ці справядлівай здаецца табе твая думка, што ты сказаў: “Апраўданне маё — перад Богам”?

³ Бо сказаў ты: “Што карысці табе? Які прыбытак будзе табе, калі б я ўчыніў грэх?”

⁴ Дык я адкажу на твае прамовы і прыяцелям тваім разам з табой.

⁵ Глянь на неба і прыгледзься; і паглядзі на хмары, што яны вышэйшыя за цябе.

⁶ Калі ты ўчыніш грэх, што зробіш ты Яму? А калі злачыннасці твае будуць памнажацца, што зробіш ты супраць Яго?

⁷ А калі будзеш чыніць справядліва, што падаруеш Яму? Або што атрымае Ён з тваёй рукі?

⁸ Чалавеку, падобнаму да цябе, бязбожнасць твая пашкодзіць, а справядлівасць твая дапаможа сыну чалавечаму.

⁹ Ад мноства крыўдзіцеляў будуць крычаць, і стагнаць будуць праз сілу рукі прыгнятальнікаў.

¹⁰ Але ніхто не сказаў: “Дзе ж Бог, Які мяне стварыў, Які даў спевы ноччу,

¹¹ Які вучыць нас болей за зямных жывёл, і больш за птушак паднебных дае нам мудрасць?”

¹² Там яны лямантуюць, але Ён не выслухае з прычыны пыхлівасці злачынцаў.

¹³ Канешне, марна: не пачуе Бог і не ўбачыць Усемагутны.

¹⁴ Хоць ты сказаў: “Ня бачу Яго”, але суд перад Ім — чакай яго.

¹⁵ І цяпер, калі ты гаворыш: “Гнеў Яго не прыносіць пакаранняў, і Ён не помсціць моцна за злачынства”;

¹⁶ надарма Ёў адчыніў вусны свае і бяздумна словы памнажае».