ЁВА 32 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ І тыя тры чалавекі перасталі адказваць Ёву, бо ён выглядаў справядлівым у вачах сваіх.

² Тады ўзгарэўся гневам Элію, сын Барахэля Бузіта, з роду Рамы. І загневаўся ён на Ёва, бо той казаў перад Богам, што ён справядлівы.

³ І загневаўся таксама на прыяцеляў яго, бо не знайшлі адказу [яму], але толькі вінавацілі Ёва.

⁴ Дык Элію перачакаў, калі Ёў гаварыў, бо тыя, што гаварылі, былі старэйшымі за яго.

⁵ Калі, аднак, Элію ўбачыў, што тыя тры не змаглі адказаць, тады дужа разгневаўся.

⁶ І прамовіў у адказ Элію, сын Барахэля Бузіта: «Я малодшы за вас гадамі, вы ж старэйшыя, дзеля таго я саромеўся і баяўся выказваць вам сваю думку.

⁷ Я сказаў сам сабе: “Хай шаноўны ўзрост гаворыць, і хай доўгі век вучыць мудрасці”.

⁸ Але, як бачу, дух ёсць у чалавеку і подых Усемагутнага дае разуменне.

⁹ Не шматгадовыя — мудрыя, і не старыя разумеюць праўду.

¹⁰ Таму я скажу: “Паслухайце мяне, і нават я выкажу вам сваё разуменне.

¹¹ Перачакаў я словы вашы, наставіў вушы на вашу мудрасць, пакуль вы шукалі [слоў],

¹² і стараўся, каб мне зразумець вас. Але, як бачу, няма такога, хто б мог аспрэчыць Ёва і хто б з вас мог адказаць на яго словы.

¹³ Каб часам вы не казалі: “Знайшлі мы мудрасць, Бог пакінуў яго, а не чалавек.

¹⁴ Не буду я рыхтаваць словы сабе, і я не паводле слоў вашых буду адказваць яму”.

¹⁵ Яны спалохаліся, і не адказвалі болей, і адганялі ад сябе прамовы.

¹⁶ І паколькі я пачакаў, а яны не гаварылі, стаялі і болей не адказвалі,

¹⁷ то і я адкажу ў сваю чаргу і выкажу сваю думку.

¹⁸ “Поўны я слоў, і сціскае мяне дух сэрца майго,

¹⁹ і нутро маё, як брага без адтуліны, якая разрывае новыя бутэлькі.

²⁰ Няхай я скажу і крыху выпушчу дух, адкрыю вусны свае і дам адказ.

²¹ Не буду звяртаць увагі на асобу, і ні перад адным чалавекам ліслівіць не буду.

²² Ды я і не ўмею ліслівіць, бо зараз жа ўзяў бы мяне Творца мой.