ЁВА 28 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Срэбра мае пачаткі жылаў, і ў золата ёсць месца, дзе яго плавяць.

² Жалеза здабываецца з зямлі, і камень, растоплены жарам, у медзь ператвараецца.

³ Усталяваў [чалавек] мяжу цемры, і даследуе ўсё сам да канца, нават камень змроку і ценю.

⁴ Вандроўны люд адкрыў падземныя праходы, якія забыты нагою; вісяць яны, хістаючыся больш за вандроўніка.

⁵ Зямля, з якой хлеб вырастаў, у глыбіні перавернута, як агнём.

⁶ Камяні яе — месца сапфіра, і глеба яе — золата.

⁷ Драпежная птушка не ведае сцежкі туды, і не бачыць яе вока арла.

⁸ Не тапталі яе сыны пыхі, і не праходзіла па ёй ільвіца.

⁹ Выцягвае ён руку сваю на крэмень, да падножжа пераварочвае горы.

¹⁰ У скалах высякае каналы, і ўсё каштоўнае бачыць вока яго.

¹¹ Выведаў ён глыбіні рачныя і вывеў на свет утоенае.

¹² Але дзе знайсці мудрасць? І дзе месца розуму?

¹³ Чалавек не ведае яе сутнасці, і не знайсці [яе] на зямлі жывых.

¹⁴ Бездань кажа: “Няма яе ўва мне”, і мора гаворыць: “Няма яе ўва мне”.

¹⁵ Нельга даць за яе чыстага золата, і не ўзважыць срэбра ў абмен на яе.

¹⁶ Нельга заплаціць золатам Афіру, ані найкаштоўнейшым сарданіксам, ані сапфірам.

¹⁷ Не зраўняецца з ёю золата або шкло, не прамяняць яе на залаты посуд.

¹⁸ Пра каралі і крышталь не ўспомняць у параўнанні з ёй, і валоданне мудрасцю лепшае за перлы.

¹⁹ Не зраўняецца з ёю тапаз з Этыёпіі, і не прыпадобніш яе да найчысцейшага золата.

²⁰ Дык адкуль паходзіць мудрасць і дзе месца розуму?

²¹ Схаваная яна ад вачэй усіх жывых і нябесным птушкам невядомая.

²² Абадон і смерць кажуць: “Вушамі нашымі мы чулі пра славу яе”.

²³ Бог ведае дарогу яе, і Ён ведае месца яе.

²⁴ Ён бачыць ускрайкі зямлі і заўважае ўсё, што пад небам.

²⁵ Ён надаў вятрам вагу і воды адмераў меркаю.

²⁶ Калі даваў закон дажджам і шлях навальніцам грымотным,

²⁷ тады ўбачыў Ён яе і расказаў, і прыгатаваў, і даследаваў яе.

²⁸ І сказаў Ён чалавеку: “Вось, страх Госпадаў — гэта і ёсць мудрасць; а пазбягаць зла — гэта розум”».