ЁВА 23 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ У адказ Ёў сказаў:

² «І сёння з горыччу жальба мая, бо рука Яго ўзнеслася цяжарам над стогнам маім.

³ О, каб я спазнаў, дзе знайсці Яго, і каб падышоў да пасада Яго!

⁴ Пакладу я перад Ім суд і напоўню вусны свае нараканнямі,

⁵ каб ведаў я словы, якімі Ён адкажа мне, і каб зразумеў, што Ён будзе гаварыць мне.

⁶ Ці ж з вялікім запалам будзе Ён спрачацца са мною? Не! Ён будзе толькі слухаць!

⁷ Тады справядлівы будзе судзіцца з Ім, і ад Суддзі свайго пайшоў бы я ў цэласці.

⁸ Калі пайду я на ўсход — Ён не з’явіцца, і калі пайду на захад — не здагадаюся, дзе Ён.

⁹ Калі далей пайду налева, не знайду Яго; калі павярну направа, не ўбачу Яго.

¹⁰ А Ён ведае дарогу маю, і калі выпрабуе мяне, я выйду [чысты], як золата.

¹¹ Нага мая трымаецца слядоў Яго, я пільную дарогу Яго і не збочваю з яе.

¹² Ад загадаў вуснаў Яго не адступаюся, і ў сэрцы сваім захоўваю словы вуснаў Яго.

¹³ Бо Ён адзіны, і хто адштурхне Яго? І што толькі хоча душа Яго, тое робіць.

¹⁴ Калі Ён на мне споўніў волю Сваю, то і іншых падобных рэчаў ёсць у Яго багата.

¹⁵ Таму я хвалююся ў прысутнасці Яго і, калі гляджу на Яго, ахоплены страхам.

¹⁶ Бог улагодзіў сэрца маё, і Усемагутны ўстрывожыў мяне,

¹⁷ бо не загінуў я ад надыходу цемры і змрок не агарнуў аблічча майго.