ЁВА 22 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ У адказ Эліфаз Тэманіт сказаў:

² «Ці можа чалавек быць карысным Богу, калі ён ледзь разумее, як самому сабе быць карысным?

³ Што за карысць Усемагутнаму, калі ты будзеш справядлівы, або што ты даеш Яму, калі б учыніў беззаганнай дарогу тваю?

⁴ Ці ж за тваю пабожнасць будзе Ён дакараць цябе і пойдзе на суд з табою?

⁵ Ды ці ж не праз ліхадзейнасць тваю шматлікую і бясконцую несправядлівасць тваю?

⁶ Бо ты ўзяў заклад ад братоў тваіх ні за што і з голых здымаў адзенне.

⁷ Ты не падаў вады спрацаванаму і галоднаму адмаўляўся даць хлеба.

⁸ Хіба заможнаму чалавеку ўспамогаю будзе зямля і, завалодаўшы, ён будзе жыць на ёй?

⁹ Удоў адпускаў ты з пустымі рукамі, і плечы сірот абцяжарваў.

¹⁰ Дзеля таго акружаны ты пасткамі і трывожыць цябе страх неспадзяваны.

¹¹ І ў цемры ты не бачыш, і напор вады прыціскае цябе.

¹² Ці ж Бог не вышэйшы за неба? Паглядзі ўгару на зоркі, як яны высока!

¹³ А ты кажаш: “Што там ведае Бог? Быццам бы Ён можа судзіць праз імглу.

¹⁴ Хмары — покрыва Яго, і не бачыць Ён нашых спраў, і ходзіць [толькі] па крузе нябесным”.

¹⁵ Ці ты прагнеш трымацца шляху спрадвечнага, па якім крочылі злачынцы,

¹⁶ якія заўчасна былі знішчаны, і рака падмыла іх грунт?

¹⁷ Яны казалі Богу: “Адыдзіся ад нас!” і “Што можа зрабіць нам Усемагутны?”

¹⁸ Калі Ён багаццем напоўніў дамы іх, іх думкі далёка былі ад Яго.

¹⁹ Справядлівыя будуць бачыць і цешыцца, і чалавек беззаганны будзе смяяцца з іх:

²⁰ “Сапраўды прапала маёмасць іх, а рэшту іх паглынуў агонь”.

²¹ Дык пагадзіся з Ім, і будзь спакойны, і праз гэта будзеш мець найлепшы плён.

²² Прымі з вуснаў Яго закон і пакладзі словы Яго ў сэрцы сваім.

²³ Калі навернешся да Усемагутнага, адновішся і адкінеш далёка несправядлівасць ад палаткі сваёй.

²⁴ Прыпадобніш золата да парахна, а камяні Афіра — да рачнога пяску,

²⁵ Усемагутны будзе тваёй крыніцай каштоўных металаў і накопіцца срэбрам для цябе.

²⁶ Тады будзеш мець дастаткова асалод ва Усемагутным і падымеш аблічча сваё да Бога.

²⁷ З пакораю будзеш прасіць Яго, і Ён выслухае цябе, і ты споўніш абяцанні свае.

²⁸ Што пастановіш, прыйдзе да цябе, і на дарогах тваіх будзе свяціць святло.

²⁹ Бо Ён паніжае таго, хто гаворыць пыхліва, а хто апускае вочы, той будзе збаўлены.

³⁰ Ён уратуе нявіннага, і будзеш ты ўратаваны ў чысціні рук сваіх».