ЁВА 21 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ У адказ сказаў Ёў:

² «Паслухайце, прашу, словы мае, і хай будуць яны вам на пацеху.

³ Цярпліва выслухайце мяне, а я буду гаварыць; і пасля слоў маіх будзеце смяяцца.

⁴ Ці ж мая прамова — супраць чалавека, што я заслужана не павінен быць нецярплівы?

⁵ Звярніце ўвагу на мяне і аслупянейце, і пакладзіце на вусны свае палец.

⁶ І я, калі ўзгадаю, палохаюся, і трымценне калоціць цела маё.

⁷ Чаму ж жывуць бязбожнікі, дажываюць да старасці і ўмацаваны багаццем?

⁸ Нашчадкі іх заўсёды перад імі, і дзеці іх — перад абліччам іх.

⁹ Дамы ў іх — бестурботныя і мірныя, і няма біча Божага над імі.

¹⁰ Цёлка ў іх пачынае ва ўлонні і не скідае, карова нараджае і не пазбаўляецца цяляці свайго.

¹¹ Дзеці іх, як статак, выходзяць, і малыя іх радуюцца, гуляючы.

¹² Яны трымаюць тымпан і цытру і весяляцца пры гуках труб,

¹³ праводзяць яны ў дабротах дні свае і ў адно імгненне сыходзяць у апраметную.

¹⁴ Яны казалі Богу: “Адыдзіся ад нас! Не хочам ведаць шляхоў Тваіх.

¹⁵ Хто такі Усемагутны, каб мы служылі Яму, і што нам за карысць, калі б мы памаліліся Яму?”

¹⁶ Няхай даброты іх у іх руках, але рада бязбожніка няхай будзе далёка ад мяне.

¹⁷ Ці часта згасае свяцільнік бязбожнікаў, і ці прыйдзе на іх згуба, і ці надасць Ён пакут [ім] у гневе Сваім?

¹⁸ Ці будуць яны, быццам саломінка перад ветрам і быццам попел, які разносіць віхура?

¹⁹ Ці захавае Бог для сыноў яго несправядлівасць яго? Хай аддасць Ён яму, каб ён ведаў.

²⁰ Убачаць вочы яго пагібель сваю, і нап’ецца ён гневу Усемагутнага.

²¹ Бо што з дому яго патрэбна яму пасля яго, калі лік месяцаў яго спыніцца?

²² Ці ж хто навучыць Бога мудрасці, Таго, Хто судзіць нябёсы?

²³ Адзін памірае ў сіле і здаровы, багаты і шчаслівы;

²⁴ нутро яго поўнае тлушчу, а косці яго багатыя мозгам.

²⁵ А іншы памірае ў горычы душы, без аніякага набытку;

²⁶ ды аднак разам будуць яны спаць у парахне, і абодвух апануюць чэрві.

²⁷ Добра зразумеў я думкі вашыя і ліхія намеры вашыя адносна мяне.

²⁸ Бо вы кажаце: “Дзе дом князя, а дзе палаткі бязбожнікаў?”

²⁹ Ці вы не пыталіся каго з падарожнікаў і ці не спазналі довадаў іх,

³⁰ што ў дзень пагібелі ашчаджаецца ліхі і ў дзень гневу адводзіцца ўбок.

³¹ Хто пакажа яму з дакорам дарогу яго, і за тое, што ён зрабіў, хто аддасць яму?

³² Яго прывядуць да магілы і пры надгробку яго паставяць варту.

³³ Салодкімі яму будуць груды зямлі, і за сабой ён цягне кожнага чалавека, і перад ім безліч.

³⁴ Дык чаму ж вы надарма пацяшаеце мяне, калі ў адказе вашым застаецца падман?»