ЁВА 18 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ У адказ сказаў Балдад Сугіт:

² «Дакуль жа будзеце вы кідаць гэтыя словы? Перш зразумейце, а потым будзем гаварыць.

³ Чаму мы лічым сябе за жывёлу, і чаму мы ў пагардзе перад вамі?

⁴ Ты, што губіш душу сваю ў гневе сваім, ці ж праз цябе апусцее зямля ды з месца свайго скалы перамесцяцца?

⁵ Бо святло бязбожніка згасне і не заззяе полымя ад агню яго.

⁶ Пацямнее святло ў палатцы яго, і свяцільнік, які над ім, згасне.

⁷ Абмежаваныя будуць крокі моцы яго, і намер яго здрадзіць яму.

⁸ Ублыталіся ў сетку ногі яго, і ходзіць ён у путах.

⁹ Пятля трымае нагу яго, і сіло закрываецца над ім.

¹⁰ Схаваная на зямлі пастка [для] яго, а сіло [для] яго — на сцежцы.

¹¹ Адусюль палохаюць яго жахі і агортваюць ногі яго.

¹² Памяншаецца ад голаду дужасць яго, і загуба падрыхтаваная рэбрам яго.

¹³ Загуба з’ядае кавалкі скуры яго, а першародны смерці мардуе члены яго.

¹⁴ Выдаляецца надзея яго з палаткі яго, і Ты штурхаеш яго да цара жахаў.

¹⁵ Ты жывеш у палатцы, якой ужо няма ў яго, у жытле яго рассыпаецца серка.

¹⁶ Знізу падсыхаюць карані яго, а зверху вянуць галінкі яго.

¹⁷ Памяць аб ім знікне з зямлі, і не будзе ўслаўляцца імя яго на плошчах.

¹⁸ Прагоняць яго са святла ў цемру і прагоняць яго са свету.

¹⁹ Не будзе ані нашчадка яго, ані пакалення ў народзе яго, і не застанецца нічога ў месцы, дзе ён жыў.

²⁰ У дзень яго аслупянеюць апошнія [нашчадкі], а першых апануе страх.

²¹ Дык вось што такое прытулкі несправядлівага, і гэткае месца таго, хто не ведае Бога».