ЁВА 17 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Дух мой саслабеў, дні мае пагаслыя, і застаецца мне толькі магіла.

² Хіба не кпіны акружаюць мяне, і не ў горычы хіба патанае вока маё?

³ Дай заклад за мяне перад Табою, і хто ж [іншы] у знак парукі стукне мяне па руцэ?

⁴ Сэрца іх аддаліў Ты ад разумення, таму яны не ўзвысяцца.

⁵ Абяцае блізкіх як здабычу, але вочы сыноў яго змарнеюць.

⁶ Ён паставіў мяне ў прымаўку народа і каб плявалі [мне] ў твар.

⁷ Пацямнела ад горычы вока маё, і члены цела майго сталіся, нібы цень.

⁸ Справядлівыя аслупянеюць, бачачы гэта, і бязгрэшны раззлуецца на бязбожніка.

⁹ І справядлівы будзе трымацца дарогі сваёй, а чысты дадасць моцы рукам.

¹⁰ Дык навярніцеся ўсе вы і прыходзьце, але я не знайду між вамі нікога разумнага.

¹¹ Дні мае прамінулі, думкі мае і памкненні сэрца майго расцерушыліся.

¹² Ператварылі яны ноч у дзень; ды зноў пасля цемры спяшаецца святло.

¹³ Калі і датрываю, то апраметная — дом мой; у цемры паслаў я ложак мой.

¹⁴ Сказаў я гнілізне: “Ты — бацька мой!”, “Маці мая і сястра мая!” — чарвям.

¹⁵ Дык дзе ж цяпер мая надзея і хто бачыць цярплівасць маю?

¹⁶ У апраметную найглыбейшую сыдуць усе справы мае, і ці будзе мне адразу супачынак у парахне?»