ЁВА 12 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ І сказаў Ёў у адказ:

² «Сапраўды: вы толькі людзі, і з вамі памрэ мудрасць.

³ І ў мяне ёсць сэрца, як і ў вас, і не ніжэйшы я за вас; хто ж не ведае таго, што вы ведаеце?

⁴ Той, хто высмейваецца сваім сябрам, як я, будзе прызываць Бога, і Ён выслухае яго; але будзе высмейвацца беззаганнасць справядлівага.

⁵ Свяцільнік занядбаны ў думках тых, якія жывуць бяспечна, прыгатаваны для тых, хто хістаецца ў хадзе.

⁶ Спакойныя палаткі рабаўнікоў і бяспечныя для тых, што гнявяць Бога, быццам Бог вядзе іх за руку.

⁷ Аднак жа, запытайся ў жывёлы, і яна навучыць цябе, і птушак паднебных, і яны пакажуць табе.

⁸ Пагавары з зямлёю, і яна навучыць цябе; і раскажуць рыбы марскія.

⁹ Хто з іх усіх не ведае, што рука Божая стварыла ўсё гэта?

¹⁰ У Яго руцэ — душа кожнай жывой істоты і дух усяго цела чалавечага.

¹¹ Ці ж не вуха адрознівае словы, і ці не паднябенне каштуе сваю ежу?

¹² У старых ёсць мудрасць, а ў даўгавечных — разважнасць.

¹³ У Яго ёсць мудрасць і сіла, Ён мае раду і разуменне.

¹⁴ Калі Ён разбурыць, то няма таго, хто адбудуе; калі Ён замкне чалавека, няма таго, хто б адчыніў.

¹⁵ Калі Ён затрымае воды, яны перасохнуць; і калі выпусціць іх, яны зруйнуюць зямлю.

¹⁶ У Яго ёсць сіла і мудрасць, Ён ведае і ашуканца, і таго, каго падманваюць.

¹⁷ Ён выводзіць радцаў пазбаўленымі багацця, а суддзяў — спустошанымі.

¹⁸ Ён развязвае пояс цароў і вяроўкай абвязвае іх сцёгны.

¹⁹ Ён даводзіць святароў да спустошанасці і скідае магнатаў,

²⁰ змяняючы вусны праўдзівых і забіраючы вучонасць старых.

²¹ Вылівае пагарду на князёў і аслабляе пояс магутных.

²² Ён выяўляе глыбіннае з цемры і выводзіць да святла цень смерці.

²³ Ён памнажае народы і нішчыць іх, і людзей пашырае і губіць, а знішчаных ізноў аднаўляе.

²⁴ Ён змяняе ход думак зямных валадароў народа і падманвае іх; і ўчыніць Ён, каб яны блукалі па забытых шляхах.

²⁵ Яны будуць хадзіць навобмацак, быццам у цемры, а не ў святле, і ўчыніць Ён, каб яны блукалі, як п’яныя.