ЁВА 11 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ І сказаў у адказ Зафар Нааматыт:

² «Ці ж таму, хто шмат гаворыць, нельга адказаць? Або ці чалавек гаваркі апраўдаецца?

³ Ці ж твая пустая гаворка прымусіць людзей маўчаць і не будзе каму спыніць цябе, калі ты пасміхаешся з іншымі?

⁴ Бо ты сказаў: “Шчырае слова маё, і чысты я ў вачах Тваіх”.

⁵ Няхай бы Сам Бог пагаварыў з табою і адкрыў вусны Свае для цябе;

⁶ каб паказаў Ён табе таямніцы мудрасці і патаемныя рады Яго, — ты б зразумеў, што многа менш Ён патрабуе ад цябе, чым заслугоўвае правіннасць твая.

⁷ Хіба заўважыш ты сляды Божыя і хіба спасцігнеш дасканала Усемагутнага?

⁸ Ён вышэй за неба, і што ты зробіш? Ён глыбей за пекла, і што ты спасцігнеш?

⁹ Даўжэйшая за зямлю мерка Яго і шырэйшая за мора.

¹⁰ Калі Ён руйнуе або закрывае і сціскае, хто запярэчыць Яму?

¹¹ Бо Ён ведае марнасць чалавечую; і няўжо ж не заўважае правіннасць, бачачы яе?

¹² Але і чалавек пусты робіцца разважлівым; а нараджаецца ён, як дзікае асляня.

¹³ Ты ж, калі сэрца сваё ўмацуеш і да Яго ўзнімеш свае рукі,

¹⁴ калі несправядлівасць, што ў руцэ тваёй, ты адкінеш ад сябе і не застанецца няпраўды ў тваёй палатцы,

¹⁵ тады ты зможаш падняць аблічча тваё без заганы, і будзеш сталы, і не будзеш баяцца.

¹⁶ Бо забудзешся ты на сваё гора і ўзгадаеш яго, як воды, што сплылі.

¹⁷ І быццам бы святло паўдзённае ўзыдзе для цябе пад вечар, і, калі ты падумаеш, што цябе пакрыла цемра, заззяеш, як зараніца.

¹⁸ І будзеш ты мець надзею, паклаўшы перад сабою спадзяванне, і, пахаваны, будзеш спаць спакойна.

¹⁹ Будзеш адпачываць, і не будзе каму цябе палохаць, і многія будуць запабягаць перад тваім абліччам.

²⁰ А вочы бязбожных аслепнуць, і прыбежышча знікне ад іх, і надзея іх — знікненне».