Эклезіясціка (Мудрасць Ісуса, сына Сіраха) 51 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Малітва Ісуса, сына Сіраха: «Буду вызнаваць Цябе, Госпадзе Валадару; і буду хваліць Цябе, Бога, Збаўцу майго.

² Буду вызнаваць імя Тваё, бо стаў Ты для мяне Успаможцам і Абаронцам,

³ і Ты вызваліў цела маё ад загубы, ад пасткі ліхога языка і ад ілжывых вуснаў, і ад супраць мяне паўстаўшых, Ты стаў для мяне Успаможцам.

⁴ І вызваліў мяне дзеля вялікай міласэрнасці і імя Свайго ад пастак, падрыхтаваных, каб мяне з’есці,

⁵ ад рук, шукаючых душы маёй, ды ад многіх бед, што нахлынулі на мяне,

⁶ ад націску агню, які акружыў мяне, і з сярэдзіны агню, дзе я не згарэў;

⁷ ад глыбокага нутра пекла, і ад ачарняючага языка, і ад слова лгарства, і ад стралы языка несправядлівага.

⁸ Душа мая наблізілася аж да смерці,

⁹ ды жыццё маё было блізка да пекла на дне.

¹⁰ Зусюль яны акружылі мяне, і не было таго, хто б мне дапамог; шукаў я дапамогі людзей, і не прыйшла яна.

¹¹ Тады ўспомніў пра міласэрнасць Тваю, Госпадзе, і дзейнасць Тваю спрадвечную,

¹² бо ратуеш тых, што пакладаюцца на цябе, Госпадзе, і вызваляеш іх з рук ліхотнікаў.

¹³ Падняў я з зямлі маленне маё і прасіў аб вызваленні ад смерці.

¹⁴ Прызваў Госпада: «Ты Айцец мой, не кідай мяне ў дзень майго гора ды ў час пыхліўцаў – без дапамогі.

¹⁵ Буду без перапынку славіць імя Тваё і буду хваліць Яго ў вызнанні». І выслухана было маленне маё.

¹⁶ І вызваліў Ты мяне ад загубы, і вырваў мяне ў час ліхі.

¹⁷ Таму буду вызнаваць Цябе і хваліць Цябе буду, ды дабраслаўляць імя Госпада.

¹⁸ Калі яшчэ малады быў, пакуль стаў падарожнічаць, шукаў слуп мудрасці ў мальбе маёй;

¹⁹ перад святыняй прасіў у малітве пра яе, і аж да канца буду шукаць яе, і расцвіла яна, як скараспелы вінаград.

²⁰ Узрадавалася з яе маё сэрца, нага мая пайшла простаю дарогаю, ад юнацтва свайго ішоў яе слядамі.

²¹ Нахінуў крыху вуха сваё і атрымаў яе,

²² і знайшоў я для сябе самога мудрасць, і меў вялікі поспех у ёй;

²³ Таму, Хто дае мне мудрасць, аддам пахвалу.

²⁴ Я бо рашыўся дзейнічаць паводле яе; і знайшоў дабро, і не пасаромлюся.

²⁵ Душа мая дзейнічала дзеля яе, і ў справах маіх я быў дакладны.

²⁶ Рукі свае выцягнуў я ўвысь і непазнавальнасць яе зразумеў.

²⁷ Душу сваю накіраваў я да яе і старанна выконваў закон.

²⁸ З ёю ад пачатку памясціў сэрца, дзеля таго не буду пакінуты.

²⁹ Нутро маё ўзрушылася, каб шукаць яе; таму здабыў я добры здабытак.

³⁰ Даў мне Госпад за плату язык мой, і ім буду славіць Яго.

³¹ Прыблізьцеся да мяне, ненавучаныя, ды збярыцеся ў дом навучэння.

³² Што вы яшчэ марудзіце ў гэтым, калі душы вашы прагнуць моцна?»

³³ Адкрыў я вусны свае і сказаў: «Бярыце сабе без срэбра,

³⁴ і нахіліце шыю вашу пад ярмо, і хай душа ваша ўспрымае павучанне: яго бо можна знайсці блізка.

³⁵ Пабачце вачамі вашымі, што я мала папрацаваў ды знайшоў сабе вялікае супакаенне.

³⁶ Набудзьце вучэнне за вялікую колькасць срэбра і здабудзеце за яго вельмі многа золата.

³⁷ Хай цешыцца душа ваша ў міласэрнасці Яго, і не пасаромеецеся ў Яго славе.

³⁸ Выконвайце справу вашу перад часам, і Ён дасць вам узнагароду вашу ў свой час».