2 ЦАРСТВАЎ 22 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ І заспяваў Давід словы гэтае песні Госпаду ў дзень, калі вызваліў яго Госпад з рук усіх ворагаў яго і з рукі Саўла,

² і ён казаў: «Госпад — скала мая, і крэпасць мая, і Збаўца мой;

³ Божа мой, скала мая, у якой хаваюся, шчыт мой і рог збаўлення майго! Ты абарона мая і прыстанак мой. Збаўца мой, ад гвалту вызваліш Ты мяне.

⁴ Паклічу я Госпада, вартага хвалы, і ад ворагаў маіх уратаваны буду.

⁵ Бо агарнулі мяне хвалі смерці, віры Бэліяла ўстрывожылі мяне;

⁶ путы смерці ахапілі мяне, і смяротныя петлі душаць мяне.

⁷ У роспачы маёй клічу я Госпада і прызываю Бога майго; выслухаў Ён з храма Свайго голас мой, і вокліч мой дайшоў да вушэй Яго.

⁸ І здрыганулася і затрымцела зямля, і падваліны нябесныя зварухнуліся і захісталіся, бо запалаў Ён гневам.

⁹ Узняўся дым з ноздраў Яго і агонь знішчальны з вуснаў Яго; вуглі агністыя сыпаліся ад Яго.

¹⁰ І нахіліў Ён нябёсы, і сышоў, і змрок пад нагамі Яго.

¹¹ І сеў на херубіна, і паляцеў, і ўзняўся на крылах ветру.

¹² І ахінуўся ў цемру, як заслону, цёмнымі водамі ды густымі хмарамі ахутаў Сябе.

¹³ Перад бляскам позірку Яго загарэлася вуголле агністае.

¹⁴ Загрымеў на нябёсах Госпад, і Найвышэйшы даў пачуць голас Свой.

¹⁵ Ён пусціў стрэлы Свае і рассыпаў іх, мноствам маланак напалохаў іх.

¹⁶ І адкрыліся глыбіні мора, і адчыніліся фундаменты сусвету ад ушчування Госпада, ад подыху духу гневу Яго.

¹⁷ Даслаў Ён [руку] з вышыні і схапіў мяне, выцягнуў мяне з глыбокіх водаў.

¹⁸ Выратаваў Ён мяне ад ворага майго наймагутнейшага, ад тых, якія ненавідзяць мяне, якія дужэйшыя за мяне.

¹⁹ Яны нахлынулі на мяне ў дзень смутку майго, і Госпад стаў для мяне апораю.

²⁰ І вывеў Ён мяне на прастор: уратаваў Ён мяне, бо спадабаўся я Яму.

²¹ І адплаціў мне Госпад паводле праўды маёй, і за чысціню рук маіх аддаў Ён мне,

²² бо я пільнаваў шляхі Госпада і не адступаўся нягодна ад Бога майго.

²³ Усе прысуды Яго перада мной, і ад загадаў Яго я не адступіў,

²⁴ і стаў я беззаганны з Ім, і высцерагаўся асабістай злачыннасці.

²⁵ І адплаціў мне Госпад паводле праўды маёй і паводле чысціні рук маіх перад вачамі Яго.

²⁶ Са святым Ты святы будзеш, і з чалавекам беззаганным беззаганны будзеш,

²⁷ і з абраным абраны будзеш, і з заганным падступны будзеш.

²⁸ І людзей бедных Ты ратуеш, а вочы ганарыстыя прыніжаеш.

²⁹ Бо Ты, Госпадзе, светач мой, і Бог мой прасвятляе цемру маю.

³⁰ З Табою я пайду ў наступ на варожыя войскі і з Богам маім пераскочу праз мур.

³¹ Божа, бязгрэшны шлях Яго, слова Госпадава агнём выпрабавана, Ён — шчыт для ўсіх, хто на Яго спадзяецца.

³² Бо хто бог, апрача Госпада? І хто скала, апрача Бога нашага?

³³ Бог, Які падперазаў мяне сілаю і зрабіў дарогу маю беззаганнай,

³⁴ зрабіўшы ногі мае такімі, як у аленя, і на вышыні падняўшы мяне;

³⁵ навучыў рукі мае барацьбе, і рукі мае нацягваюць медны лук.

³⁶ Ты даў мне шчыт збаўлення Твайго, і тое, што Ты слухаеш мяне, узвялічвае мяне.

³⁷ Ты пашырыў крокі мае пада мною, і не хістаюцца ногі мае.

³⁸ Я пераследаваў ворагаў маіх, і таптаў іх, і не вяртаўся, пакуль не знішчаў іх.

³⁹ Я нішчыў іх і знішчаў так, каб яны не маглі падняцца: гінулі яны пад нагамі маімі.

⁴⁰ Ты падперазаў мяне сілай да бою, тых, хто паўстаў супраць мяне, падпарадкаваў мне.

⁴¹ Ты прымушаў уцякаць ворагаў маіх, і я знішчаю ненавіснікаў маіх.

⁴² Крычалі яны, і не было нікога, хто б выратаваў іх, клікалі Госпада, і Ён не паслухаў іх.

⁴³ Я расцярушыў іх, як пыл зямлі, як гразь вуліц таптаў я іх.

⁴⁴ Ты выратаваў мяне ад бунтаў народа майго, паставіў мяне на чале плямёнаў. Народ, якога я не ведаў, служыць мне,

⁴⁵ чужыя сыны ліслівяць перада мною, слухаюць мяне слухам вушэй сваіх.

⁴⁶ Чужыя сыны адступаюць і дрыжаць ва ўмацаваннях сваіх.

⁴⁷ Жыве Госпад, і дабраславёны будзь, скала мая, і будзь узвялічаны Бог, скала збаўлення майго.

⁴⁸ Бог, Які дае мне збаўленне і Які падпарадкоўвае народы мне.

⁴⁹ Ён вызваліў мяне ад ворагаў маіх і ўзнёс мяне над тымі, хто паўстае супраць мяне; ад чалавека гвалтоўнага Ты ўхаваў.

⁵⁰ Таму буду славіць Цябе між народамі, Госпадзе, і буду спяваць на славу імя Твайго:

⁵¹ услаўляе Ён збаўленнем цара Свайго і аказвае міласэрнасць намашчэнцу Свайму Давіду і нашчадкам яго навекі».