1 ЦІМАФЕЯ 4 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Дух, вось, адкрыта кажа, што ў апошнія часы некаторыя адступяцца ад веры і прыхіляцца да духаў спакусы і да навук дэманавых,

² крывадушна падманваючых і са спаленым сумленнем сваім,

³ забараняючых жаніцца, ужываць у ежу стравы, якія стварыў Бог і даў тым, што пазналі праўду, каб дзякавалі Богу.

⁴ Бо любое стварэнне Бога добрае, і нічога не трэба адкідаць, што з падзякаю прымаецца;

⁵ бо ўсвячаецца яно праз слова Божае і малітву.

⁶ Выясняючы гэта братам, будзеш добрым паслугачом Хрыста Ісуса ў словах веры і добрай навукі, якой ты заўсёды трымаўся.

⁷ Недарэчных і бабскіх плётак высцерагайся. Практыкуй сябе ў пабожнасці.

⁸ Бо цялесныя практыкаванні мала карысныя, пабожнасць жа да ўсяго прыдатная, маючы абяцанне жыцця цяперашняга і будучага.

⁹ Праўдзівае гэтае слова і вартае ўсякай увагі.

¹⁰ Бо дзеля гэтага мы працуем і ганьбаванне церпім, што спадзяёмся на Бога жывога, Які ёсць Збаўца ўсіх людзей, а ў першую чаргу верных.

¹¹ Загадвай гэта і вучы.

¹² Няхай ніхто не пагарджае тваёй маладосцю, але будзь прыкладам верным у слове, у паводзінах, у любові, у духу, у веры, у чысціні.

¹³ Пакуль прыбуду, займіся чытаннем, суцяшэннем, навукаю.

¹⁴ Не занядбай даравання, якое ў табе, якое дадзена табе праз прароцтва з ускладаннем рук старэйшых.

¹⁵ Аб гэтым думай, будзь у гэтым, каб поспех твой усім быў бачны.

¹⁶ 5 Углядайся ў сябе і тое, чаму навучаеш, трывай у гэтым; бо, так робячы, і сябе збавіш, і тых, каторыя слухаюць цябе.