1 ЦІМАФЕЯ 2 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Дык прашу найперш, каб узносілі просьбы, малітвы, умольванні і падзякі за ўсіх людзей,

² за цароў і за ўсіх тых, што знаходзяцца пры ўладзе, каб маглі мы весці жыццё ціхае і спакойнае з усёю пабожнасцю і прыстойнасцю.

³ Бо гэта добра і міла Збаўцу нашаму Богу,

⁴ Які хоча збавіць усіх людзей і давесці іх да пазнання праўды.

⁵ Бо адзін Бог, і адзін Пасярэднік між Богам і людзьмі – чалавек Хрыстос Ісус,

⁶ Які Самога Сябе выдаў дзеля адкуплення за ўсіх, як сведчанне ў свой час,

⁷ на які і я прызначаны прапаведнікам, і Апосталам, і, праўду кажу у Хрысце, не ашукваю, настаўнікам паганаў у веры і праўдзе.

⁸ Дык хачу, каб мужчыны маліліся на кожным месцы, падымаючы чыстыя рукі без гневу і спрэчак.

⁹ Падобна і жанчыны ў прыстойным адзенні, упрыгожаныя са сціпласцю і цнатлівасцю не пляценнем валасоў ці золатам або перламі ці каштоўнымі строямі,

¹⁰ але як належыць жанчынам, лепш выяўляючы пабожнасць праз добрыя справы.

¹¹ Жанчына няхай вучыцца ў ціхасці, з поўнай пакорлівасцю.

¹² Не дазваляю жанчыне навучаць і панаваць над мужам, але каб заставалася ў ціхасці.

¹³ Бо Адам быў першым створаны, а потым Ева.

¹⁴ І не Адам даўся звесціся, а жанчына была зведзена і ўпала ў злачынства.

¹⁵ 3 Яна будзе збаўлена, родзячы дзяцей і трываючы ў веры, любові і святасці са сціпласцю.