1 КАРЫНФЯНАЎ 12 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Не хачу, браты, каб вы не ведалі пра духоўныя дары.

² Бо вы ведаеце, як вы былі паганамі, дык хадзілі да нямых ідалаў, быццам вялі вас.

³ Дзеля таго даводжу вам, што ніхто, хто гаворыць у Духу Божым, не кажа: «Анатэма Ісусу!» Ды ніхто не можа назваць Госпадам Ісуса, як толькі ў Духу Святым.

⁴ Розныя дары ласкі, але адзін і той самы Дух.

⁵ І адрозненні ў служэннях, але той самы Госпад.

⁶ І адрозненні ў дзейнасці, але той самы Бог, Які ўсё ва ўсіх робіць.

⁷ Кожнаму даецца аб’яўленне Духа для карысці.

⁸ Аднаму даецца Духам слова мудрасці, другому даецца тым самым Духам слова ведання,

⁹ яшчэ іншаму даецца вера тым жа Духам, іншаму – дары аздараўлення тым самым Духам,

¹⁰ іншаму – чыніць цуды, іншаму – праракаванне, іншаму – распазнаванне духаў, іншаму – розныя мовы, іншаму – тлумачэнне моў.

¹¹ Усё гэта робіць адзін і той самы Дух, даючы кожнаму, як Ён хоча.

¹² Як адно цела мае многа членаў, а ўсе члены аднаго цела, хоць іх многа, твораць адно цела, так і Хрыстос.

¹³ Мы бо ўсе адным Духам ахрышчаны ў адно цела, ці то юдэі, ці то грэкі, ці то нявольнікі, ці то свабодныя, і ўсе напоены адным Духам.

¹⁴ А цела складаецца не з аднаго члена, але з многіх.

¹⁵ Калі б нага сказала: «Я не ад цела, бо я не рука», дык няўжо яна таму і не ад цела?

¹⁶ Або калі вуха скажа: «Я не ад цела, бо я не вока», дык няўжо яно і не ад цела?

¹⁷ Калі б усё цела было вокам, дзе ж слых? А калі б усё цела было б слых, дык дзе нюх?

¹⁸ Але цяпер Бог размясціў члены так, што кожны з іх у целе, як Ён захацеў.

¹⁹ А калі б усе былі адным членам, дык дзе ж цела?

²⁰ Вось цяпер членаў многа, а цела – адно.

²¹ Не можа вока сказаць руцэ: «Ты мне непатрэбна!» або галава нагам: «Вы мне не патрэбны!»

²² Наадварот, члены цела, якія падаюцца слабейшымі, больш патрэбныя,

²³ ды тыя, якія мы лічым менш пачэснымі ў целе, мы акружаем асаблівай пашанай, а тыя, што лічацца непрыстойнымі, маюць асаблівае ўшанаванне,

²⁴ а нашы прыстойныя не патрабуюць нічога. Але Бог уфармаваў цела, даўшы большую пашану таму, якому не хапае,

²⁵ каб не было ў целе раздзялення, але каб паасобныя члены рупіліся адзін аб адным.

²⁶ Такім чынам, калі церпіць адзін член, церпяць з ім усе члены. Падобна, калі славіцца адзін член, радуюцца з ім усе члены.

²⁷ Вы – Цела Хрыстова, а паасобна – члены.

²⁸ І адных Бог паставіў у Царкве па-першае – Апосталамі, па-другое – прарокамі, па-трэцяе – настаўнікамі, потым тых, што маюць моц чынення цудаў, потым дары аздараўлення, дар успамогі, дар гаспадаравання, дар усякіх моў.

²⁹ А ці ўсе Апосталы? Ці ўсе прарокі? Ці ўсе настаўнікі? Ці ўсе сілы?

³⁰ Ці ўсе маюць дары аздараўлення? Ці ўсе гавораць мовамі? Ці ўсе тлумачаць?

³¹ Рупцеся аб дарах большых, а я вам пакажу шлях яшчэ больш дасканалы.